ვიდრე ირანის რეჟიმი მშვიდობიანი მიზნებით მოქმედებას არ გადაწყვეტს, ყველა სახელმწიფომ მისი იზოლაცია უნდა მოახდინოს, რადგან თეირანი წვრთნის და იარაღით ამარაგებს ტერორისტებს, რაც რეგიონში ქაოსს იწვევს. ამის შესახებ აშშ-ის პრეზიდენტმა საუდის არაბეთში არაბულ-ამერიკულ სამიტზე სიტყვით გამოსვლისას განაცხადა.
დონალდ ტრამპის თქმით, ლიბანში, ერაყში, იემენსა და სირიაში შექმნილ არასტაბილურ მდგომარეობაზე პასუხისმგებლობა სწორედ ირანს ეკისრება. ტრამპმა ასევე აღნიშნა, რომ ირანის მხარდაჭერით სირიის პრეზიდენტმა, ბაშარ ასადმა წარმოუდგენელი დანაშაული ჩაიდინა. აშშ-ის პრეზიდენტის განცხადებებს სოციალურ ქსელ “თვითერში" ირანის საგარეო საქმეთა მინისტრი გამოეხმაურა.
მოჰამად ჯავად ზარიფის თქმით, ტრამპის თავდასხმა ირანზე ვაშინგტონის საგარეო პოლიტიკას სრულად არ ასახავს.
ზარიფის აზრით, აშშ-ში საუდის არაბეთის ინვესტიციებზე ხაზგასმა ნიშნავს, რომ ტრამპი ელ-რიადიდან 480 მილიარდი დოლარის გადაქაჩვას ცდილობს.