რამდენად ხარისხიანად მოწმდება ქვეყანაში ატმოსფერული ჰაერის ხარისხი და რა არის დაბინძურების ძირითადი წყაროები - ამ თემებზე დღეს გარემოს დაცვის მინისტრმა საპარლამენტო კომიტეტის წევრების წინაშე გამოსვლისას ისაუბრა.
მინისტრმა დეპუტატებს საქართველოსა და ევროკავშირს შორის ასოცირების შესახებ შეთანხმების ფარგლებში ატმოსფერული ჰაერის დაცვის კუთხით არსებული მოთხოვნები გააცნო.
ოპოზიციას გიგლა აგულაშვილის მიმართ შეკითხვები ძირითადად ხეების ჭრასთან დაკავშირებით ჰქონდა. „ევროპული საქართველოს“ წარმომადგენელი ელენე ხოშტარია დაინტერესდა, რამდენად იყო მინისტრი ინფორმირებული თბილისში ხეების ჭრასთან დაკავშირებით. ხოშტარიამ მინისტრს ასევე ჰკითხა, უნდა ხდებოდეს თუ არა ქალაქში ქვის თლა, რაც ჰაერის დაბინძურებას იწვევს.
პასუხად გიგლა აგულაშვილმა განაცხადა, რომ ხეები მხოლოდ სანიტარიული მიზნებით იჭრება.