საფრანგეთში მიმდინარე არჩევნებზე, პრეზიდენტობის ყველა კანდიდატმა საკუთარი პოზიცია უკვე დააფიქსირა.
საარჩევნო უბანზე იმყოფებოდა საფრანგეთის პრეზიდენტი, ფრანსუა ოლანდიც. არჩევნების პირველი ტური უსაფრთხოების გამკაცრებული ზომების ფონზე მიმდინარეობს.
რამდენიმე საათის წინ, ქვეყნის აღმოსავლეთით, ქალაქ ბეზანსონში ორ საარჩევნო უბანზე ევაკუაცია გამოცხადდა.
410-ე და 411-ე უბნები დროებით დახურული იყო. გავრცელებული ინფორმაციით, ევაკუაციის მიზეზი საეჭვო ავტომანქანა გახდა, რომელიც პოლიციამ საარჩევნო უბნებთან ახლოს შენიშნა. ამ დროისთვის ვითარება სტაბილურია. უსაფრთხოებას 50 ათასი პოლიციელი იცავს.
გამოკითხვების თანახმად, საპრეზიდენტო არჩევნების ფავორიტებად ულტრამემარჯვენე პარტია ეროვნული ფრონტის ლიდერი, მარინ ლე პენი, ეკონომიკის ყოფილი მინისტრი, ლიბერალ-ცენტრისტი ემანუელ მაკრონი, ყოფილი პრემიერ-მინისტრი, კონსერვატორი ფრანსუა ფიიონი და რადიკალი მემარცხენე ჟან ლუკ მელანშონი ითვლებიან.