გამკაცრებული უსაფრთხოების ფონზე ირჩევს საფრანგეთი ახალ პრეზიდენტს. ელისეს მინდვრებზე მომხდარი თავდასხმის შემდეგ , რომელსაც პოლიციის ერთი თანამშრომელი ემსხვერპლა, ქვეყნის მასშტაბით საარჩევნო უბნებს პოლიცია და სამხედროები იცავენ.
ხმის მიცემის პროცესი ძირითად უბნებზე ერთ საათში დასრულდება, თუმცა ვინ გახდება ქვეყნის პირველი პირი, ეს მეორე ტურმა უნდა გადაწყვიტოს.
წინასწარი გამოკითხვებით, ყველაზე მაღალი რეიტინგი 11 კანდიდატიდან 5-ს აქვს. აქედან მეორე ტურში გადასვლის დიდი შანსი აქვს ორ კანდიდატს - ემანუელ მარკონის და მარინ ლე პენს. პირველი ცენტრისტია და მისი გამარჯვების შემთხვევვაში რადიკალურ ცვლილებებს პოლიტოლოგები არ ელოდებიან. ლეპენი კი ულტრამემარჯვენეა. მისი გამარჯვების შემთხვევაში, ეს კანდიდატი ეცდება საფრანგეთი გაიყვანოს როგორც ნატო-ს, ისე ევროკავშირის შემადგენლობიდან. თუმცა, საფრანგეთი შერეული მმართველობის ქვეყანაა და პრეზიდენტს სრული ძალაუფლებისთვის პარლამენტის უმრავლესობაც სჭირდება.