პრეზიდენტის გამოსვლის დასაწყისი იყო ბრალდების შემცველი, მგონია, რომ შეცდომა იყო, როდესაც პრეზიდენტმა გამოსვლა ასე დაიწყო“, - ამის შესახებ საპარლამენტო უმრავლესობის წევრმა ეკა ბესელიამ საზოგადოებრივს გიორგი მარგველაშვილის ყოველწლიური საპარლამენტო გამოსვლის შეფასებისას განაცხადა.
მისი თქმით, დიალოგის მოსურნე პრეზიდენტს უნდა ჰქონდეს მეტად კონსტრუქციული ტონი.
„ჩვენ კრიტიკა არ გვაფრთხობს, არ ველოდით, რომ პრეზიდენტის გამოსვლა იქნებოდა ქება-დიდება, მაგრამ არ არის სასურველი, როდესაც პრეზიდენტი, რეალურად, როგორც მხარე ისე ელაპარაკება პარლამენტს და არა როგორც ნეიტრალური არბიტრი.
ჩვენ ვაპირებთ მას ფაქტებით ვესაუბროთ, ყველა მის ბრალდებაზე გვაქვს კონტრარგუმენტი. ცრუ განცხადება გაკეთდა რომ სასამართლოში კრიზისია და არ არის შიგნიდან დიალოგი “, - განაცხადა ეკა ბესელიამ.
საპარლამენტო უმრავლესობის წევრი გამოეხმაურა გიორგი მარგველაშვილის განცხადებას, სადაც პრეზიდენტი აღნიშნავს, რო მმმართველმა პოლიტიკურმა ძალამ პრაქტიკულად უარი თქვა დიალოგზე და ჩაიკეტა საკუთარ თავში.
„თუ პრეზიდენტი ჩაკეტილობას ეძახის იმას, რომ ფორმალური დიალოგი არის მხოლოდ იმიტომ, რომ ამ დიალოგს მოყვეს ეგრევე ვეტოს დადება, რა თქმა უნდა, ასეთი დიალოგი აზრს კარგავს. ჩვენ ყველა სამუშაო პროცესში ვიწვევთ მის წარმომადგენლებს. ეს ნიშნავს, რომ გახსნილია სივრცე თანამშრომლობის, მაგრამ, სამწუხაროდ, ჩვენ ვხედავთ მისი მხრიდან მხოლოდ ვეტოების დახუნძლულ სტატისტიკას. არამგონია ეს იყოს კონსტრუქციული“, - განაცხადა ეკა ბესელიამ.
საქართველოს პრეზიდენტი პარლამენტის წინაშე ყოველწლიური მოხსენებით წარსდგა. ამ წუთებში, სესიაზე შესვენებაა გამოცხადებული, რომლის დასრულების შემდეგაც საკანონმდებლო ორგანოში დებატები გაიმართება.