მოგმართავთ ბატონო პრეზიდენტო, არა ჩაკეტილი, არამედ გახსნილი, არა დიალოგზე უარის მთქმელი, არამედ დიალოგისა და მეტი წინსვლის, მეტი პროგრესის, მეტი რეფორმებისთვის მზაობის მქონე კოლეგების და კომიტეტის სახელით, - ასე მიმართა უმრავლესობის წევრმა ეკა ბესელიამ პარლამენტის პლენარულ სხდომაზე საქართველოს პრეზიდენტს.

როგორც ეკა ბესელიამ გიორგი მარგველაშვილის ყოველწლიური მოხსენების შეფასებისას აღნიშნა, პრეზიდენტი უნდა იცავდეს კონსტიტუცია და პატივს უნდა სცემდეს საკანონმდებლო ორგანოს.

„როდესაც საპარლამენტო უმრავლესობას აღიქვამთ, როგორც არა მხოლოდ თეორიულ საფრთხედ, არამედ სერიოზულ პრობლემად, აქ უკვე დიალოგის სივრცეს ნაკლებად ტოვებთ, ან ეს მოწმდება ხდება ისეთივე ფორმალური, როგორც წინასწარ დაანონსებული ვეტოს ფონზე, მოდი დავილაპარაკოთ, ხვალ როგორ დავადოთ ვეტო განსაკუთრებით ისეთ კანონებს, რომელიც ქვეყნის და მოქალაქეების უსაფრთხოების გარანტიების მატარებელ სისტემურ ხედვას და კანონდებლობას ეხება. იყო ნათქვამი, რომ სასამართლოში არის დუმილი და შიგნიდან არ გვესმის, ვერ ვგრძნობთ ხმას და დინამიკას ცვლილებების აუცილებლობაზე. თუნდაც რამდენიმე დღის წინ შეხვედრა,რომელიც იყო ღია და საჯარო ფორმატში ძალიან მნიშვნელოვანი იყო სწორედ ამ დიალოგისა და ამ თემებზე სასაუბროდ“, - განაცხადა ეკა ბესელიამ.

როგორც დეპუტატმა აღნიშნა, კარგი იქნებოდა, რომ პრეზიდენტის გამოსვლაში მოესმინა სასამართლო რეფორმების წარმატებულობის შესახებ.

"სასამართლო დღეს კი არ არის კრიზისში, არამედ სასამართლო გამოვიყვანეთ კრიზისიდან. გასულ წელს იყო საინტერესო სურათი 429 გამამართლებელი განაჩენი იყო, 330-ზე მეტი სრულად გამართლებული და შეწყვეტილი საქმე. წინასწარი პატიმრობის დინამიკა, დღეს მხოლოდ 29% გვაქვს 2016 წლის მონაცემებით, მაშინ როდესაც გვახსოვს, როგორი იყო, თითქმის 100% უტოლდება დაკმაყოფილების მაჩვენებელი. იყო მოწოდება, რომ მოუსმინეთ სახალხო დამცველს. მე ველოდებოდი, თქვენ აღნიშნავდით იმას, რომ სწორედ 2013 წელს პირველად ჩვენ მივიღეთ პარლამენტში დადგენილება სახალხო დამცველის რეკომენდაციების გაზიარებასთან დაკავშირებით. 2016 წელს 200 რეკომენდაცია გავიზიარეთ სახალხო დამცველის. განათლებაზე იყო საუბარი და კარგი იქნებოდა ეხსენებინა ჩვენს პრეზიდენტს, რომ 2 წელი ჩვენ ძალიან მნიშვნელოვან სისტემურ რეფორმაზე ვიმუშავეთ.ეს არის ძალიან დიდი რეფორმა, ევროპული სტანდარტები ყველა მიმართულებით, რომელიც ეხება სკოლამდელ დაწესებულებებს“, - აღნიშნა ეკა ბესელიამ.

მისივე თქმით, ძალიან მნიშვნელოვანია კონსტიტუციური პრინციპების დაცვა და ძალიან მნიშვნელოვანია ინსტიტუციების დაცვა.

„ჩვენ პატივს ვცემთ ამ ინსტიტუციებს და პატივისცემას იმსახურებს პარლამენტიც, რომლის საკანონმდებლო საქმიანობაში შეჭრის და მისთვის კონტროლის და მისთვის კონკრეტული მითითებების მიცემის უფლება არავის არ აქვს და შენიშვნები არ უნდა ცილდებოდეს ფარგლებს და ძალიან მნიშვნელოვანია ამ ინსტიტუტის პატივისცემა, რომელიც არის საკანონდებლო ორგანო. პრეზიდენტი უნდა იცავდეს კონსტიტუცია და პატივს უნდა სცემდეს საკანონმდებლო ორგანოს“, - აღნიშნა ეკა ბესელიამ.