ამერიკა არ გამორიცხავს რუსეთთან თანამშრომლობის შესაძლებლობას, მაგრამ მხოლოდ საკუთარი ინტერესების დაცვის შემდეგ, – ეს განცხადება ამერიკის სახელმწიფო მდივანმა რექს ტილერსონმა რუს კოლეგასთან შეხვედრის შემდეგ გააკეთა.
ტილერსონი და ლავროვი ერთმანეთს გერმანიაში დიდი ოცეულის სამიტის ფარგლებში შეხვდნენ.
ტილერსონის თქმით, იქ, სადაც მხარეებს უთანხმოება აქვთ, ამერიკა დაიცავს საკუთარ და მოკავშირეების ინტერესებსა და ფასეულობებს.
ტილერსონმა ასევე აღნიშნა, რომ რუსეთისგან ელოდება მინსკის შეთანხმების ფარგლებში ნაკისრი ვალდებულებების შესრულებასა და რეგიონში არსებული მდგომარეობის სტაბილიზაციის პროცესს.
თავის მხრივ, რუსეთის საგარეო საქმეთა მინისტრმა განაცხადა, რომ მხარეები შეთანხმდნენ იმ მიმართულებებთან დაკავშირებით თანამშრომლობაზე, სადაც მათი ინტერესები ემთხვევა, კერძოდ კი - ტერორიზმთან ბრძოლის საკითხში.