გერმანიის ქალაქ კიოლნის პოლიციამ, ახალი წლის ღამეს, გასული წლის მსგავსი არეულობის გამეორების თავიდან აცილება შეძლო.

სამართალდამცველებმა 1 იანვარს ღამით 650 მოქალაქე გაჩხრიკეს. როგორც შინაგან საქმეთა სამინისტროში განმარტეს, დოკუმენტები ძირითადად, ჩრდილოეთ აფრიკელ მიგრანტებს შეუმოწმეს, რომლებიც აგრესიულად იქცეოდნენ. შედეგად, ქალაქის ცენტრალურ მოედანზე გამართულ საზეიმო ღონისძიებაზე არ დაუშვეს 190 ადამიანი, 92 კი პოლიციაში გადაიყვანეს.

31 დეკემბრის ღამეს, კიოლნის ცენტრში წესრიგს 1700 პოლიციელი იცავდა. მიუხედავად ამისა, სამართალდამცველებმა სექსუალური ძალადობის ათი შემთხვევის აღკვეთა მაინც ვერ შეძლეს.

კიოლნში, ახალი წლის ღამეს უსაფრთხოების განსაკუთრებული ზომები მას შემდეგ მიიღეს, რაც შარშან, ამავე პერიოდში, ქალაქში მასობრივი არეულობა და სექსუალური ძალადობის არაერთი შემთხვევა მოხდა. მაშინ თავდამსხმელების უმეტესობა აფრიკელი მიგრანტი იყო.