შინაგან საქმეთა სამინისტროში არ ადასტურებენ მედიაში გავრცელებულ ინფორმაციას, რომ თბილისში, ქავთარაძის ქუჩაზე მოკლული მამაკაცი ბიზნესმენ ბესო ხარძიანის მკვლელობაში ბრალდებული პირია.
როგორც საზოგადოებრივ მაუწყებელს შსს-ში განუცხადეს, გუშინ მოკლული პირი არ არის ხარძიანის მკვლელობაში ბრალდებული ოლეგ დოევი. შსს-ს ინფორმაციითვე, ქავთარაძის ქუჩაზე მოკლულ მამაკაცს ხარძიანის მკვლელობასთან კავშირი არ ჰქონია.
უწყების ცნობით, საქმეზე გამოძიება სისხლის სამართლის კოდექსის ორი მუხლით, 108-ე (განზრახ მკვლელობა) და 236-ე (ცეცხლსასროლი იარაღის მართლსაწინააღმდეგო შეძენა, შენახვა, ტარება), მიმდინარეობს. საქმეზე დაწყებულია ინტენსიური საგამოძიებო მოქმედებები.
საზოგადოებრივი მაუწყებელი დაუკავშირდა ასევე ბესო ხარძიანის ოჯახის ადვოკატს, მალხაზ სალაყაიას, რომელმაც განაცხადა, რომ საქმესთან დაკავშირებით, არც შსს-დან და არც პროკურატურიდან, ამ დრომდე, არავინ დაკავშირებია.