მწვავე კრიტიკის ფონზე მიმდინარეობდა პარლამენტში ე.წ. ლარიზაციის გეგმის განხილვა. დეპუტატებმა 2017 წლიდან ასამოქმედებელი ახალი რეგულაციები ფინანსთა მინისტრის მოადგილისგან მოისმინეს.
განსაკუთრებული პროტესტი საკანონმდებლო ცვლილებათა პაკეტის იმ ნაწილს მოჰყვა, რომლის მიხედვით, უძრავი ქონების რეალიზაცია და რეკლამირება მხოლოდ ლარში უნდა მოხდეს. სხვა შემთხვევაში ფიზიკური და იურიდიული პირებისთვის ფინანსური სანქციებია გათვალისწინებული.
მმართველი გუნდი მოსალოდნელ შეზღუდვას მომხმარებელთა უფლებების დაცვის და ეროვნული ვალუტის მიმართ ნდობის გაზრდის არგუმენტით ხსნის.
თუმცა რეგულაციას არ ეთანხმება საპარლამენტო უმცირესობა. ხელისუფლების ოპონენტების მტკიცებით, ეროვნული ვალუტის კურსის გაუფასურების შემთხვევაში, კანონში შეტანილი ცვლილება ბიზნესს სერიოზულ პრობლემებს შეუქმნის. საწინააღმდეგოს ამბობენ დეველოპერები.