ხმაურიანი აღმოჩნდა საკონსტიტუციო ცვლილებების საჯარო განხილვის პირველი დღე. სადავო პროექტის შინაარსს ქუთაისის მესხიშვილის სახელობის თეატრში შეკრებილი მოქალაქეები გაეცნენ.

დახვეწილი საპარლამენტო მმართველობის შექმნა და პარტიების განვითარება ის არგუმენტებია, რითიც მმართველი გუნდი პრეზიდენტის არაპირდაპირი წესით არჩევას, ბლოკების აკრძალვას და საარჩევნო ბარიერის უცვლელად დატოვებას ხსნის.

საორგანიზაციო კომისიაში მყოფმა ოპონენტებმა ცვლილებები ამჯერად სცენიდან, დანარჩენმა ოპოზიციამ კი დარბაზიდან გააკრიტიკეს. უკმაყოფილების მიზეზი გახდა განხილვაზე დამსწრეთა შემადგენლობაც, რომელთა უმრავლესობამ პრეზიდენტის არაპირდაპირ არჩევას დაუჭირა მხარი.