გარემოსა და ბუნებრივი რესურსების დაცვის მინისტრი გიგლა აგულაშვილი შვედეთის გარემოს დაცვისადმი მიძღვნილი დღეების გახსნას შვედეთის ელჩთან საქართველოში მარტინა ქვიქთან და აჭარის მთავრობის თავმჯდომარესთან არჩილ ხაბაძესთან ერთად დაესწრო. აქციის ფარგლებში დაგეგმილი ღონისძიებები ქალაქ ბათუმში 7 ივნისს დაიწყება და სამი დღის განმავლობაში გაგრძელდება.
ბათუმის საზაფხულო თეატრში, შვედი და ქართველი კარიკატურისტების გამოფენა „კლიმატის ცვლილების პირისპირ“ გაიმართა.
გამოფენა დღემდე მსოფლიოს 23 ქვეყანაში 250 ათასზე მეტმა ადამიანმა დაათვალიერა. შვედეთის გარემოსდაცვითი პოლიტიკის მიზანია 2020 წლისთვის შექმნას საზოგადოება, სადაც ძირითადი გარემოსდაცვითი პრობლემები გადაწყვეტილი იქნება. ეს არის დაპირება მომავალი თაობებისთვის, რომ მათ ექნებათ სუფთა ჰაერი და ჯანსაღი საარსებო გარემო.
ღონისძიება შვედეთის საელჩომ გარემოსა და ბუნებრივი რესურსების დაცვის სამინისტროს, ბათუმის მერიის, შვედური ინსტიტუტისა და შოთა რუსთაველის სახელობის უნივერსიტეტის მხარდაჭერით გამართა.
შვედეთის გარემოს გარემოს დაცვისადმი მიძღვნილი დღეების ფარგლებში ღონისძიებებს სამთავრობო, არასამთავრობო და დიპლომატიური კორპუსის წარმომადგენლები დაესწრებიან.