გარემოს დაცვის საერთაშორისო დღეს კომპანია „კოკა-კოლა ბოთლერს ჯორჯიასა“ და ქალაქ ბათუმის „სანდასუფთავების“ ორგანიზებით ბათუმში მასშტაბური დასუფთავების აქცია გაიმართა. აქციის მთავარი გზავნილია - „ბათუმი - სუფთა და მწვანე გარემოსთვის“, მიზანი კი რამდენიმეა: ზღვისპირა ქალაქის სანაპირო ზოლის, პარკებისა და საზოგადოებრივი სივრცეების დასუფთავება, გარემოში არა მართული პლასტმასისა და სხვადასხვა მუნიციპალური ნარჩენების შემცირება და კლიმატის ცვლილების საკითხზე საზოგადოების ცნობიერების ამაღლება. ღონისძიებაში „კოკა-კოლა ბოთლერს ჯორჯიას“ ბათუმის წარმომადგენლობა, ქალაქ ბათუმის „სანდასუფთავება“, ბათუმის შოთა რუსთაველის სახელმწიფო უნივერსიტეტის , საზღვაო აკადემიის სტუდენტები და მოხალისეები მონაწილეობდნენ. 5 ივნისს დასუფთავების აქცია ბათუმში მდინარე ჭოროხის მარჯვენა შესართავთან (ახალი ბულვარი) გაიმართა. შეგროვებული ნარჩენი დახარისხდა. პლასტმასის ნარჩენი ცალკე გამოიყო და გადამამუშავებელ კომპანიას რეციკლირებისთვის გადაეცა, შერეული საყოფაცხოვრებო ნარჩენების გატანა კი ბათუმის დასუფთავების სამსახური ნაგავსაყრელზე უზრუნველყო. ნარჩენების სეპარირებული შეგროვებით საზოგადოების გარემოსდაცვითი პასუხისმგებლობა გაძლიერდება და ნარჩენების გადამუშავების კულტურის დამკვიდრებას შეუწყობს ხელს. ეს კი გრძელვადიან პერსპექტივაში გარემოს დაბინძურების შემცირებას, რესურსების ეფექტიან გამოყენებასა და ეკოლოგიურად პასუხისმგებელი საზოგადოების ფორმირებას უზრუნველყოფს.


#ახალიამბები #BusinessMediaGeorgia