■ საქართველოს შრომის, ჯანმრთელობისა და სოციალური დაცვის სამინისტროს ლ. საყვარელიძის სახელობის დაავადებათა კონტროლისა და საზოგადოებრივი ჯანმრთელობის ეროვნული ცენტრში ჯანმრთელობის მსოფლიო ორგანიზაციის თამბაქოს კონტროლის ჩარჩო კონვენციის ძალაში შესვლის 10 წლის იუბილესთან დაკავშირებით პრესკონფერენცია სლოგანით - მრავალი სიცოცხლის გადარჩენის ათწლეული გაიმართა.
შეხვედრას შრომის, ჯანმრთელობისა და სოციალური დაცვის სამინისტროს, განათლებისა და მეცნიერებისა სამინისტროს და დაავადებათა კონტროლისა და საზოგადოებრივი ჯანმრთელობის ეროვნული ცენტრის ხელმძღვანელი პირები და დარგის ექსპერტები ესწრებოდნენ.
ჯანმრთელობის მსოფლიო ორგანიზაციის თამბაქოს კონტროლის ჩარჩო-კონვენცია მსოფლიოში ერთადერთ საზოგადეობრივი ჯანმრთელობის ინსტრუმენტს წარმოადგენს, რომელსაც ლეგალური ვალდებულება აქვს. ჩარჩო-კონვენციის მიზანია ადამიანების სიცოცხლის გადარჩენა თამბაქოს ნაწარმის მოხმარების კონტროლის გზით. კონვენციაზე ამჟამად მიერთებულია მსოფლიოს 179 ქვეყანა და ევროკავშირი, რაც ხაზს უსვამს მის მნიშვნელობას.
თამბაქოს კონტროლის ჩარჩო კონვენცია ავალდებულებს მასზე მიერთებულ მთავრობებს მხარი დაუჭირონ მის განხორციელებას. საზოგადოებრივ ჯანმრთელობასა და თამბაქოს ინდუსტრიის (სახელმწიფო თამბაქოს მონოპოლიების ჩათვლით) ინტერესებს შორის არსებული შეურიგებელი კონფლიქტის გამო კონვენცია ასევე ავალდებულებს მხარეებს დაიცვან თამბაქოს კონტროლის პოლიტიკა თამბაქოს ინდუსტრიის ჩარევისაგან.
თამბაქოს გლობალური ეპიდემია დაახლოებით 6 მილიონ ადამიანს კლავს ყოველწლიურად, აქედან 600 000–ზე მეტი მეორადი კვამლით იღუპება. საქართველოში თამბაქოს მოხმარებასთან დაკავშირებით საკმაოდ საგანგაშო მდგომარეობაა. თამბაქოსაგან გამოწვეული დაავადებებით ყოველწლიურად 11 000 ადამიანი იღუპება, აქედან 3 000 პასიური მოწევის მსხვერპლია.
შრომის, ჯანმრთელობისა და სოციალური დაცვის სამინისტროს მიერ სამოქმედო გეგმით გათვალისწინებული ღონისძიებების განსახორციელებლად მომზადებულია 2015 წელს განსახორციელებელი ღონისძიებების სახელმწიფო პროგრამა.