გაიღიმე და დღე განათდება...
და ზეცაზე დაამთქნარებს ცისარტყელა,
გაუღიმე მოყვასსა შენსა,
სიკეთე ჰქმენ, გაივლი და წინ დაგხვდება!

მერე აუცილებლად
ღრუბლები აცეკვდება
კალია ააწრუპუნებს ვიოლინოს
ისე, როგორც წყაროსგან იწყება ყველა მდინარე.
მეგობრობა იწყება ღიმილისაგან.

ერთი კარგი ღიმილისაგან
შეწყვეტს დენას თვით დეპრესიული წვიმა,
არჩევნებით მოვა მთავრობა
და იქნება უკეთესი ვიდრე წინა!

მერე აუცილებლად საზღვრები გაიხსნება,
ჟენევას გადმოიტანენ სადმე ჩვენთან,
წართმეულ ქართველობას დაგვიბრუნებს ევროპა
და პუტინიც გაიხარებს ჩვენთან ერთად.

ერთი კარგი ღიმილისაგან
პენსიები მოიმატებს ყოველ კვირას,
მიშა ჩამოვა ოდესიდან
და სიყვარულს აუხსნის ის ჩვენს ბიძინას.

მერე აუცილებლად ბიძინა აცეკვდება,
მიშას აჩუქებს სახსოვრად ორ ცალ პინგვინს,
მიშა დაკრეფს ყვავილებს, დაწნავს სპეციალურად
ბიძინასთვის ლამაზ გვირილების გვირგვინს.

ერთი კარგი ღიმილისაგან,
სტალინის კოლოსს დავდგამთ ფუნიკულიორზე,
რომ იქიდან გვითვალთვალოს და
დაგვაკვალიანოს ამ ღიმილის ფონზე.

მერე აუცილებლად გაისმება ხმაური,
თურმე ჩვენი მეზობელი იგინება,
წყალი ჩასვლია საწყალს, კარებზე გვიბრახუნებს,
გინებისგან ღიმილით გაგვეღვიძება.

ღიმილი რომ მართლა გვჭირდება,
ამას მოწმობს თუნდაც ეს მარტივი ფაქტი,
სიზმარიც პოლიტიკურია:
უღიმილოდ გარანტირებული ინფარქტი!