თიბისის ფინანსური მხარდაჭერით, საქართველოში 2 მილიარდი დოლარის ღირებულების მეგაპროექტი ხორციელდება. დედაქალაქში Trump Tower Tbilisi-ის ოფიციალური საერთაშორისო პრეზენტაცია გაიმართა, რომელიც მასშტაბური ურბანული განაშენიანების, Downtown Tbilisi-ის პირველი ფაზაა. ღონისძიებას მთავრობის წარმომადგენლებთან და ადგილობრივ ბიზნესსექტორთან ერთად, The Trump Organization-ის აღმასრულებელი ვიცე-პრეზიდენტები ესწრებოდნენ. პროექტის განხორციელება კომპლექსური ფინანსური და დეველოპერული სტრუქტურით მიმდინარეობს, სადაც ერთ-ერთ წამყვან როლს თიბისი, როგორც მთავარი ფინანსური მხარდამჭერი, ასრულებს. საინვესტიციო მიმართულებით, თიბისისთან ერთად ჩართულნი არიან საერთაშორისო და ადგილობრივი ფონდები: Block Stone Capital, Finvest და Vector Group.მშენებლობისა და განვითარების პროცესს კი The Trump Organization-თან თანამშრომლობით, მთავარი პარტნიორები და დეველოპერები - არქი ჯგუფი და ინვია უძღვებიან. პროექტის თანადეველოპერია The Sapir Organization. საინვესტიციო გეგმის თანახმად, Downtown Tbilisi-ის ტერიტორიაზე ჯამში ექვსი თაუერი განთავსდება. ინფრასტრუქტურა სრულად დაფარავს როგორც ლუქს-კლასის საცხოვრებელ და სასტუმრო მიმართულებებს, ისე პრემიუმ კლასის ბიზნეს-ცენტრებსა და სავაჭრო სივრცეებს. რეგიონში პირველი Trump Tower სწორედ ამ მრავალმილიარდიანი ეკოსისტემის მთავარი ნაწილი იქნება.


#ახალიამბები #BusinessMediaGeorgia