საქართველოს მთავრობის გადაწყვეტილებით, რომელსაც პრემიერ-მინისტრმა ირაკლი კობახიძემ მოაწერა ხელი, ქვეყანაში ძაღლების ჰიპერპოპულაციის მართვის მიზნით 2026 წლის 1 ივლისიდან სამწლიანი მორატორიუმი წესდება. 27 თებერვალს გამოცემული დადგენილება კრძალავს კონკრეტული ჯიშების მოშენებას, რის დარღვევისთვისაც ფიზიკური და იურიდიული პირები 10,000 ლარით დაჯარიმდებიან. რეგულაცია ვრცელდება როგორც მომეტებული რისკის მქონე ჯიშებზე — მათ შორის ამერიკულ პიტ ბულ ტერიერზე, ფილა ბრაზილეიროზე, სტაფორდშირის ტერიერზე, არგენტინულ დოგზე, ტოსა ინუზე, კანე კორსოსა და სტაფორდშირ ბულ ტერიერზე — ასევე ჰასკის, მალამუტისა და ლაიკის ჯიშის ძაღლებზე.

პროგრამის ფარგლებში სახელმწიფო მასშტაბურ ღონისძიებებს გეგმავს, რაც 76 ათასი მიუსაფარი ცხოველის თავშესაფარში გადაყვანას, ვაქცინაციასა და სტერილიზაციას, ასევე 142,929 პატრონიანი ძაღლის იდენტიფიკაციასა და 27,000-ზე მეტი ცხოველის სტერილიზაციას გულისხმობს. პროცესის ეფექტურობისთვის რეგიონებში, კერძოდ სამეგრელო-ზემო სვანეთში, სამცხე-ჯავახეთსა და ქვემო ქართლში, ახალი მუნიციპალური თავშესაფრები აშენდება ან არსებული ინფრასტრუქტურა მოეწყობა. პარალელურად, მკაცრდება გარემოში დაბრუნების წესები: ძაღლების გაშვება კატეგორიულად იკრძალება სკოლების, ბაღების, სამედიცინო დაწესებულებების, კვების ობიექტებისა და სპორტული მოედნების მიმდებარედ. აღნიშნულ კომპლექსურ გეგმას, რომლის მიზანიც რისკების შემცირება და პოპულაციის კონტროლია, გარემოს დაცვისა და სოფლის მეურნეობის სამინისტროს კოორდინაციით სურსათის ეროვნული სააგენტო და მუნიციპალიტეტები განახორციელებენ.

როგორ უნდა შემცირდეს ქვეყანაში ჰიპერპოპულაცია და რამდენად აღსრულდება რეგულაცია?

სტუმარი: თაკო გოგიჩაიშვილი - Modern Dog Resort-ის დამფუძნებელი

#ქალებისნარატივი მარიამ იზორიასთან ერთად

#ახალიამბები #BusinessMediaGeorgia