გასული კვირეულიdან გამოსაყოფი კიდევ ერთი თემა, ბიზნესმენ ვანო გოგლიძეს დაპატიმრება გახლდათ, საგამოძიებო უწყებების ინფორმაციით ბრალდებულმა, 2025 წელს, სახელმწიფო ტენდერის საფუძველზე გაფორმებული ხელშეკრულების ფარგლებში, სასაზღვრო პოლიციასა და შპს „სახელმწიფო კვებით უზრუნველყოფას“ 380 792 ლარის ღირებულების 24 177.3 კილოგრამი თევზის კონსერვი მიაწოდა. აღნიშნული პროდუქცია განკუთვნილი იყო საქართველოს შინაგან საქმეთა და თავდაცვის სამინისტროების თანამშრომელთა კვებისთვის. საგამოძიებო მოქმედებების შედეგად, მათ შორის საწარმოს ჩხრეკისას, ამოღებულია 17 241 ერთეული ფალსიფიცირებული თევზის კონსერვი. ასევე დადგინდა, რომ პროდუქციის დამზადებისა და ნედლეულის შენახვის პირობები სურსათის უსაფრთხოების მოთხოვნებს კრიტიკულად არ შეესაბამებოდა. ამოღებულ პროდუქტებზე ჩატარებული ქიმიური და მიკრობიოლოგიური ექსპერტიზის დასკვნით, კონსერვი არ აკმაყოფილებს მიკრობიოლოგიურ სტანდარტებს და უვარგისია მოხმარებისთვის. რიგ შემთხვევებში ექსპერტიზის ჩატარება ვერ მოხერხდა, რადგან პროდუქცია მაღალი ტოქსიკურობის გამო საფრთხეს უქმნიდა თავად ექსპერტის სიცოცხლესა და ჯანმრთელობას.გარდა ამისა, დადგინდა, რომ კონსერვის შიგთავსი, თევზის ხორცის მასური წილითა და ენერგეტიკული ღირებულებით, არ შეესაბამება ეტიკეტზე მითითებულ მონაცემებს. ტენდერების მონიტორის თანახმად, კომპანია "ბატონოს" სახელმწიფოსთვის სასურსათო პროდუქტების - თევზის და ძროხის ხორცის მიწოდების ტენდერებში კონტრაქტები 2020 წლიდან გაუფორმდა. აღნიშნული კონტრაქტების ჯამური ღირებულება 8 მილიონ ლარს შეადგენს. ბიზნესმენ გოგლიძის ადვოკატი კახა წერეთელი მისი გათავისუფლების სანაცვლოდ 500 000-ლარიანი გირაოს შუამდგომლობას აყენებდა, თუმცა მოსამართლემ ეს მოთხოვნა არ გაიზიარა. ეს კი ნიშნავს, რომ ბიზნესმენი და კომპანია კულას დამფუძნებელი წინასწარ პატიმრობაში დარჩა.

სტუმარი: კახა წერეთელი - ადვოკატი;

ინტერვიუერი: გიორგი ისაკაძე - BMG, გენერალური პროდიუსერი;

#ახალიამბები #BusinessMediaGeorgia