ქართული ოცნების მთავრობამ მორიგი გენიალური დადგენილება გამოსცა, რომელიც 6 წელზე მეტი წლოვანების ასაკის ავტომობილების იმპორტს კრძალავს.

დოკუმენტის თანახმად, დადგენილება 2026 წლის 1 აპრილიდან ამოქმედდება. მთავრობის მიერ დასახელებული მიზნებია: ავტოპარკის განახლება, ჰაერის ხარისხის გაუმჯობესება, მოსახლეობის ჯანმრთელობის დაცვა და საცობების შემცირება.

თუმცა კრიტიკოსების შეფასებით, გადაწყვეტილებამ შესაძლოა ვერც ამ მიზნებს უპასუხოს და მეორე მხრივ კრიტიკულად დამაზიანებელი აღმოჩნდეს ეკონომიკური თუ სოციალური მიმართულებით.

კერძოდ, ავტოიმპორტის სექტორი, რომელიც საქართველოში ერთ-ერთი მსხვილი ეკონომიკური მიმართულებაა და ასიათასობით ადამიანს ასაქმებს, მნიშვნელოვნად დაზარალდება.

შემცირდება 2020 წლამდე გამოშვებული ავტომობილების იმპორტი, რაც ბაზრის ბრუნვის დიდ ნაწილს შეადგენს. გაიზრდება როგორც ახალი, ასევე მეორადი ავტომობილების ფასები ადგილობრივ ბაზარზე. მომხმარებლების ნაწილს მოუწევს ძველი ავტომობილების უფრო ხანგრძლივი ექსპლუატაცია.

გავლენა შეეხება დაკავშირებულ სექტორებსაც: ტრანსპორტირებას, საბანკო სფეროს, საბაჟო ინფრასტრუქტურას, ავტოსერვისებსა და ნაწილების ბაზარს, რომელიც არცთუ ისე მცირეა.

ასევე აღინიშნება, რომ მხოლოდ ავტომობილის ასაკზე დაფუძნებული შეზღუდვა არ იძლევა ეკოლოგიური სტანდარტების გაუმჯობესების ავტომატურ გარანტიას, რადგან გამონაბოლქვი და ეკოლოგიური ეფექტი დამოკიდებულია ტექნიკურ მდგომარეობასა და კონკრეტულ სტანდარტებზე, ასე მაგალითად შესაძლოა ევროსტანდარტებით აწყობილ მოდელს უფრო მეტი მოთხოვნა ჰქონდეს, ვიდრე მაგ. ჩინეთში აწყობილ ახალ მოდელს.

რაც შეეხება საცობებისგან ქალაქის განტვირთვას, ეს რომ მანქანის წლოვანებასთან კავშირში არ არის ალბათ ყველას კარგად გვესმის და არც იმის ილუზია აქვს ვინმეს, რომ არსებული ავტოპარკით შევწყვეტთ სიარულს.

რა მიზანი აქვს მთავრობას და რა პერსპექტივები იკვეთება მისი ამოქმედების შემთხვევაში?

სტუმრები: ალექსი ნონიაძე - ავტოიმპორტიორთა ასოციაციის ხელმძღვანელი;
გიორგი ჯაფარიძე - "ჩემი ქალაქი მკლავს“ დამფუძნებელი;
ალექსანდრე ვეკუა - Caucasus Auto Import-ის გაყიდვების დეპარტამენტის უფროსი;

#ახალიამბები #BusinessMediaGeorgia