2025 წელი საქართველოს ტურიზმის სექტორისთვის რეკორდული იყო. ოფიციალური სტატისტიკით, გასულ წელს საქართველოს 7.8 მილიონი საერთაშორისო მოგზაური ეწვია, რაც 2024 წელთან შედარებით 5.9%-ით არის გაზრდილი. აქედან 5.5 მილიონი ვიზიტი უშუალოდ ტურისტულ ვიზიტს წარმოადგენდა, რაც წლიურად 8.4%-იანი მატებაა. საქართველოს ყველაზე მეტი ვიზიტორი კვლავ მეზობელი ქვეყნებიდან და აზიური ბაზრებიდან ჰყავს. მიუხედავად იმისა, რომ ზრდაა ევროკავშირის და დიდი ბრიტანეთიდან, ტურიზმის ტოპ 10 ქვეყანას შორის ევროკავშირის არცერთი წევრი ქვეყანა არაა. ტურიზმის სექტორის წარმომადგენლების ნაწილი ამბობს, რომ გასული წელი როგორც რაოდენობრივად, ასევე შემოსავლების ზრდის კუთხით დადებითი იყო. ბიზნესის ნაწილი კი აღნიშნავს, რომ კვლავ მაღალმხარჯველუნარიანი ტურისტების სიმცირე შეინიშნება, რაც დარგის შემოსავლებზე ნეგატიურად აისახება.

#ახალიამბები #BusinessMediaGeorgia