სასტუმრო Holiday Inn-ში, საქართველოს უნივერსიტეტის ინოვაციების ცენტრმა - UG Startup Factory-მ შემაჯამებელი ღონისძიება Demo Day- გამართა, რომელიც სტუდენტებს ინოვაციური იდეებიდან რეალური ბიზნესის შექმნის შესაძლებლობას აძლევს. დემო დღის ფარგლებში, უნივერსიტეტის საინვესტიციო ფონდის მხარდაჭერით, სტუდენტების ინოვაციური სტარტაპ იდეები 50 000 ლარით დაფინანსდა, გამარჯვება ჯამში 5-მა სტარტაპმა მოიპოვა. მათ შორის - Von BIODESIGN-მა, nexus-მა, readya.me-მ, tourspace-მა და safeticks-მა. აქვე გეტყვით, რომ Demo Day UG Startup Factory-ის პრე-აქსელერაციის პროგრამის კულმინაციაა. ღონისძიებაზე სტუდენტური გუნდები საკუთარ ბიზნესიდეებს კომპეტენტური ჟიურის წინაშე წარადგენენ. ჟიური კი გამარჯვებულ გუნდებს ავლენს, რომლებიც დაფინანსებას იდეების რეალიზაციისა და განვითარების მიზნით იღებენ. იდეების პრეზენტაციასთან ერთად, დემო დღის ფარგლებში პანელური დისკუსიაც გაიმართა, სადაც მოწვეულმა სპიკერებმა ისაუბრეს უნივერსიტეტის როლზე სტარტაპ ეკოსისტემის ჩამოყალიბებასა და განვითარებაში. საქართველოს უნივერსიტეტის ინოვაციების ცენტრი 2024 წლიდან მუშაობს სტარტაპ ინკუბაციისა და აქსელერაციის მიმართულებით, ახორციელებს ნეთვორქინგ პროექტებს, ქმნის საგანმანათლებლო რესურსებსა და აძლიერებს სტუდენტებს პრაქტიკული ცოდნითა და რეალური გამოცდილებით. მისი წამყვანი მიმართულება პრე-აქსელერაციის პროგრამაა. პრე-აქსელერაციის პროგრამა წელიწადში ოთხჯერ - ქართულ და ინგლისურ ენებზე ტარდება. პროგრამის მიზანი ბიზნესის შექმნის საწყის ეტაპზე სტუდენტებისა და ახალგაზრდების მხარდაჭერაა.


#ახალიამბები #BusinessMediaGeorgia