თბილისის მეტროს პირველ ხაზზე - გლდანსა და ვარკეთილში დამატებით 2 სადგური აშენდება - ამის შესახებ მოახლოებული არჩევნების პირობებში თბილისის მერმა და "ოცნების" მერობის კანდიდატმა კახა კალაძემ მუნიციპალიტეტის მთავრობის გუშინდელ სხდომაზე განაცხადა.

აღსანიშნია, რომ თბილისის სატრანსპორტო კომპანიამ მეტროს პირველი ხაზის 5 კილომეტრით დაგრძელების და გლდანსა და ვარკეთილში ახალი სადგურების მშენებლობის მიზნით საერთაშორისო ფასების მოკვლევა მიმდინარე წლის აპრილში გამოაცხადა. ფასების გამოკვლევით უნდა დადგინდეს თუ რამდენი ასეული მილიონი დოლარი დაჯდება აღნიშნული პროექტი.

როგორც კახა კალაძემ მთავრობის სხდომაზე განაცხადა, გლდანსა და ვარკეთილში სადგურების დამატებით შემცირდება საზოგადოებრივ ტრანსპორტში დახარჯული ჯამური მგზავრობის დრო, დაახლოებით, 576 საათით, რაც ქსელის განტვირთვის დამატებითი შესაძლებლობაა.

თბილისის მერის თქმით, გლდანის მიმართულებით პერსპექტიული ხაზი დაგრძელდება 1.1 კმ-ით. დილის პიკის საათში ახალი სადგური მიიზიდავს 5 500 მგზავრს.

მისივე განმარტებით, პროექტი გააუმჯობესებს საფეხმავლო და ზოგად მისაწვდომობას, მეტროსადგურების უახლოესი უბნები მიზიდულობის წერტილებად იქცევა და გაიზრდება ეკონომიკური აქტივობა.

ორი ახალი სადგური არ არის ერთადერთი ამბიციური განაცხადი, რაც ბოლო დროს მერისგან მოვისმინეთ, აპრილში ასევე ცნობილი გახდა, რომ „თბილისის სატრანსპორტო კომპანია“ მეტროპოლიტენის ახალი - მესამე ხაზის დიდუბე-რუსთაველის მონაკვეთის საპროექტო-სახარჯთაღრიცხვო დოკუმენტაციის შედგენის და მშენებლობის შესყიდვის თაობაზეც ატარებდა ბაზრის კვლევას.

რამდენად რეალისტურად განხორციელებადია მსგავსი მასშტაბის პროექტები ტრამვაისთან ერთად, მაშინ როცა მეტროსადგური ვარკეთილის რეაბილიტაციას წლობით ვერ ვასრულებთ?

სტუმარი: გიორგი ბაბუნაშვილი - "ურბანული ლაბორატორიის" ხელმძღვანელი;

#ახალიამბები #BusinessMediaGeorgia