"თიბისი კაპიტალი" პორტფელური ინვესტიციებში ახალ ტენდენციაზე მიუთითებს. საინვესტიციო ბანკი აღნიშნავს, რომ 2022 წლის შემდეგ საქართველოს საგარეო ბალანსის გაუმჯობესების მიუხედავად, მიმდინარე ანგარიში კვლავ დეფიციტში რჩება. ამის ფონზე კი, საყურადღებოა პორტფელური ინვესტიციების დინამიკა, სადაც საქართველოს რეზიდენტების მიერ უცხოური სავალო ფასიანი ქაღალდების შეძენა იკვეთება, რაც ისტორიულად საქართველოს საგადასახდელო ბალანსისთვის დამახასიათებელი მოვლენა არ ყოფილა. ამავდროულად, სახეზეა რეზიდენტების მიერ გამოშვებული სავალო ფასიანი ქაღალდების ნაწილობრივი გამოსყიდვაც. ორგანიზაცია აღნიშნავს, რომ საქართველოს საგადასახდელო ბალანსის ბოლოდროინდელი დინამიკა ისტორიული ტენდენციებისგან მკვეთრ გადახვევასაც წარმოადგენს. კერძოდ, მიმდინარე ანგარიშის მხრივ ტურიზმიდან შემოსავლების ზომიერი ზრდის პარალელურად, ინფორმაციისა და კომუნიკაციის და ბიზნეს სერვისების ექსპორტი სწრაფ ზრდას განაგრძობს, რაც დიდწილად ცვლის მომსახურების ექსპორტის სტრუქტურას; ფინანსური ანგარიშის მხრივ კი იკვეთება რომ გააქტიურებულია საქართველოს რეზიდენტების მიერ უცხოური აქტივების შეძენა; ანგარიშში ასევე მითითებულია, რომ დაფინანსების წყაროს წარმოადგენდა სავალუტო რეზერვებიც, თუმცა სებ-ის მიერ აშშ დოლარის მოცულობითი შესყიდვის პარალელურად, მეორე კვარტალში ეს ტენდენცია შეიცვლება.


#ახალიამბები #BusinessMediaGeorgia