საქართველოს ვიზალიბერალიზაციის შესანარჩუნებლად საჭირო რეკომენდაციების შესრულებისთვის ვადა აგვისტოს ბოლომდე აქვს.
"ქართულმა ოცნებამ" 14 ივნისს ბრიუსელიდან წერილი მიიღო, სადაც გასული წლის ბოლოს გაცემული რეკომენდაციების შესრულებაზე განახლებული ინფორმაციაა მოთხოვნილი. კომისია საქართველოს ხელისუფლებისგან ინფორმაციას 31 აგვისტომდე ელის და ასევე ელის კონკრეტულ ნაბიჯებს შესაბამისი საკითხების მოსაგვარებლად. საუბარია იმ რეკომენდაციებზე, რომლებიც 2024 წლის 6 დეკემბერს მიღებულ ვიზის შეჩერების მექანიზმის მეშვიდე ანგარიშში მიემართა საქართველოს.

ანგარიშში ევროკომისიამ შეშფოთება გამოთქვა საქართველოში ფუნდამენტური უფლებებისა და თავისუფლებების სერიოზული დარღვევების შესახებ. სწორედ ამ კონტექსტში, იანვარში ევროკავშირმა შეაჩერა უვიზო რეჟიმი ქართული დიპლომატიური პასპორტების მფლობელთათვის.

ევროკომისია რეკომენდაციების შესრულებას შემდეგი ვიზის შეჩერების მექანიზმის ანგარიშის ფარგლებში შეაფასებს, რის საფუძველზეც, დარღვევების გაგრძელების შემთხვევაში, შეუძლია მიიღოს შესაბამისი ზომები მე-8 მუხლის საფუძველზე, ვიზის შეჩერების მექანიზმის გააქტიურებით.

"ქართულ ოცნებაში" ევროკომისიის 8 რეკომენდაციას "ცარიელ ულტიმატუმს" უწოდებენ და ბრიუსელიდან არგუმენტებს ითხოვენ. როგორც ირაკლი კობახიძემ გასული კვირის ბოლოს განაცხადა, "ევროპაში ვიზით წახვალ თუ უვიზოდ, ეს ეგზისტენციალური საკითხი არ არის". მისივე თქმით, "თუ საკითხი ისე დადგება - ან მშვიდობა ან ვიზალიბერალიზაცია, ჩვენ უპირატესობას მშვიდობას და სტაბილურობას მივანიჭებთ".

რა მოხდება, თუ ვიზალიბერალიზაციას შეგვიჩერდება?

სტუმარი: მამუკა კელაურაძე - გამყვანი ტურიზმის ასოციაციის თანადამფუძნებელი & ტურისტული სააგენტო "კლარკ რობინსი“ აღმასრულებელი დირექტორი


#ახალიამბები #BusinessMediaGeorgia