რობოტების მწარმოებელმა ამერიკულმა კომპანია Boston Dynamics-მა საკუთარი პროდუქტების მარკეტინგისთვის საინტერესო გზა მოიფიქრა და რობოტები ამერიკულ “ნიჭიერში” გამოიყვანა. სცენაზე Boston Dynamics-ის ხუთი ოთხფეხა რობოტი გამოჩნდა, რომლებმაც ბრიტანული როკჯგუფის, Queen-ის Don’t Stop Me Now-ზე სინქრონში იცეკვეს. ნომრის შესრულებისას ერთ-ერთი რობოტი გაითიშა, მაგრამ ჟიურის წევრებმა ეს დადებით, მეტად ადამიანურ ფაქტორად შეაფასეს. Boston Dynamics-მა ჟიურისგან ოთხი “კი” მიიღო და America’s Got Talent-ის შემდეგ ეტაპზე გადავიდა.

კომერციული რობოტების ბაზარზე Boston Dynamics-ი ერთ-ერთი პიონერია, რომელიც ჯერ კიდევ 1992 წელს, MIT-ის ბაზაზე დაფუძნდა. თავდაპირველად, კომპანია ბიოლოგიური მოძრაობის სიმულაციაზე მუშაობდა და ორი პროტოტიპული რობოტი წარმოადგინა — BigDog და Cheetah. სხვადასხვა დროს, Boston Dynamics-ი ჯერ Google-ის, შემდეგ კი SoftBank-ის საკუთრებაში იყო, მაგრამ 2021 წლიდან ამერიკულ კომპანიას კორეული Hyundai Motor Group-ი ფლობს. კომპანიის მიზანია შექმნას რობოტები, რომლებიც რეალურ, ხშირად ადამიანისთვის მიუწვდომელ გარემოში რთული დავალებების შესრულებას შეძლებენ.

#ახალიამბები #BusinessMediaGeorgia