კანონპროექტის საპარლამენტო განხილვა, რომელიც უცხოელებისთვის საქართველოში ინ ვიტრო და სუროგაციის სერვისის მიღებას კრძალავს, კიდევ ერთხელ გადაიდო. საუბარია 2023 წელს ინიცირებულ “რეპროდუქციის შესახებ” კანონში ცვლილებებზე, რომელიც პირველ ეტაპზე დაჩქარებულად განიხილებოდა, თუმცა მეორე წელია დოკუმენტის საპარლამენტო განხილვა შეჩერებულია. ჯანდაცვის კომიტეტმა ბიუროსთვის გაგზავნილ წერილში განმარტა, რომ კანონპროექტების განსახილველად მომზადების მიზნით მიმდინარეობს კონსულტაციები და სწორედ ამიტომ, მიზანშეწონილია განხილვის ვადა კიდევ სამი თვით გაგრძელდეს. უცხოელებისთვის ინ ვიტრო და სუროგაციის სერვისის მიღების აკრძალვის დაანონსებიდან მალევე, ჯანდაცვის სამინისტრომ სფეროს რეგულირებისთვის ახალი რეგულაციები აამოქმედა. კერძოდ, 2024 წლის 1 იანვრიდან დამხმარე რეპროდუქციული ტექნოლოგიებით სერვისის მიმწოდებელი ყველა დაწესებულება ვალდებული გახდა, რეპროდუქციასთან დაკავშირებულ საქმიანობაზე ინფორმაცია ერთიან ეროვნულ რეესტრში ასახოს. მთავრობის განმარტებით, ცვლილების მიზანი გამოყენებული ქსოვილების, უჯრედებისა და ემბრიონების შესახებ მონაცემებისა და კონტაქტში მყოფი მასალების მიკვლევადობაა. აღნიშნული ცვლილებების შემდეგ საჭიროებს თუ არა სფერო უფრო მკაცრ რეგულაციებს და რამდენად სწორი იქნება გადაწყვეტილება უცხოელებისთვის სერვისების აკრძალვის შესახებ და როგორ წარმოუდგენია დარგის რეგულირება თავად ამ სფეროს წარმომადგენლებს?

სტუმარი: ლიკა ჭყონია - ქართულ-ამერიკული რეპროდუქციული კლინიკა “რეპროარტის” დამფუძნებელი



#ახალიამბები #BusinessMediaGeorgia