პორტუგალიის ჩემპიონატში ლისაბონური "სპორტინგი" ერთ-ერთ ადგილობრივ გრანდად მიიჩნევა, მასთან ერთად კი დიდ სამეულში ბენფიკა და პორტოც შედიან. პორტუგალიაში მათ ტრიოს წმინდა სამებას უწოდებენ, რადგან ძირითად შემთხვევაში სწორედ ამ სამ გუნდზე ნაწილდება შიდა ტიტულები. მომავალი სეზონიდან სწორედ "სპორტინგის" რიგებში ვიხილავთ საქართველოს ნაკრების "კაპიტან საქართველოდ" წოდებულ გიორგი ქოჩორაშვილს, რომელმაც ეს ტრანზიტი აბსოლუტურად დაიმსახურა. ესპანეთის მესამე დივიზიონში დაწყებული კარიერა და თავის დასამკვიდრებელი ბრძოლა ჯერ საქართველოს ნაკრებში თამაშით, შემდეგ ევროპის ჩემპიონატზე გასვლითა და საბოლოოდ იმ კლუბში ტრანსფერით დაუგვირგვინდა, რომელსაც თვით კრიშტიანუ რონალდუ ჰყავს აღზრდილი და მასთან ერთად კიდევ არაერთი დიდებული სუპერვარსკვლავი. "სპორტინგი" თავისი ქვეყნის მოქმედი ჩემპიონია მუდმივად ასპარეზობს ჩემპიონთა ლიგაზე და შეიძლება ითქვას, რომ ქოჩორას ტოპ კარიერა მხოლოდ ახლა იწყება. გიორგის აქამდე თუ უმაღლეს ლიგაში არასდროს უთამაშია, ოცნებებს ახლა აიხდენს და პორტუგალიის ერთ-ერთ უმთავრეს გუნდს სამომავლოდ მსოფლიო გრანდში გადასასვლელ ტრამპლინად გამოიყენებს.

#ახალიამბები #BusinessMediaGeorgia