#ახალიამბები
ათიდან ერთ მოქალაქეს, ანუ გამოკითხულთა 12%-ს საკვების ფული არ აქვს, ხოლო ოთხიდან ერთს, ანუ 28%-ს ფული მხოლოდ საკვებზე ჰყოფნის. ამის შესახებ ეროვნულ-დემოკრატიული ინსტიტუტის მიერ, 2023 წლის ოქტომბერში ჩატარებულ კვლევაში წერია. 45% აცხადებს, რომ ფული ჰყოფნის საკვებზეც და ტანსაცმელზეც, მაგრამ არ აქვს საშუალება ძვირადღირებული საყოფაცხოვრებო ნივთები შეიძინოს. NDI- ის თანახმად, მხოლოდ 10%-ს აქვს შესაძლებლობა იყიდოს ისეთი ტექნიკა, როგორიცაა მაცივარი და სარეცხი მანქანა. მხოლოდ 3 % ახერხებს შეიძინოს ის, რაც სჭირდება. მონაცემები შეცვლილია 2022 დეკემბრის კვლევასთან შედარებით - მაშინ 18% ამბობდა, რომ საკვებზე ფული არ ჰყოფნიდა, ხოლო 35%-ის თქმით, ფული ჰყოფნიდა საკვებზე, მაგრამ არ ჰყოფნიდა ტანსაცმელზე. ამასთან, გამოკითხული მოსახლეობის უმეტესობა ეკონომიკის მდგომარეობას "საშუალოდ" აფასებს - კერძოდ, 49% ამბობს, რომ მდგომარეობა საშუალოა, 42%-ის აზრით, ცუდი, მხოლოდ 6% ფიქრობს, რომ ეკონომიკის მდგომარეობა კარგია, ხოლო 2%-მა არ იცის. ოქტომბერში ჩატარებული გამოკითხვა სულ 2,068 დასრულებულ ინტერვიუს მოიცავს. საშუალო ცდომილების ზღვარი კვლევაში +/- 2,2 პროცენტია.