მსგავსი უცენზურო სიტყვებითრეზო მესხიძეს სოფელ აჭყვისთავში, ქობულეთის მერის წარმომადგენელმა მიმართა. მოქალაქე ამბობს, რომ ტარიელ ანანიძემ პასუხისმგებლობა ამ ფორმით აირიდა. ბოლო დროს განვითარებული სტიქიის შედეგად დაზარალებული ადგილობრივ ხელისუფლებას დახმარებას სთხოვდა.
ეს პირველი შემთხვევა არ არის, როცა ქობულეთის მუნიციპალიტეტის, სოფელ აჭყვისთავში მცხოვრები მესხიძეების 5 წევრიანი ოჯახი, მერიისგან დახმარებას ითხოვს. არაერთი მცდელობის შემდეგ, უწყებამ ადგილზე მხოლოდ ფერდსამაგრი სამუშაოები განახორციელა, ისიც არაჯეროვნად. მესხიძეებს, საფრთხე კვლავ, ყოველი უამინდობისას ემუქრებათ.
რევაზ მესხიძე გვიყვება, რომ სამუშაოების წარმოების პროცესში, სახლთან მისასვლელი გზის აღდგენასაც დაჰპირდნენ, ოჯახი თავს ამ ნაწილშიც მოტყუებულად გრძნობს.
ქობულეთის მერიაში ტრადიციულად, სატელევიზიო კომენტარი არ გააკეთეს. შესაბამისად კითხვების დასმის საშუალება არ მოგვეცა. პრეს-სამსახურის მიერ მოწოდებულ ინფორმაციაში კი ვკითხულობთ:
„აღნიშნული სამუშაოებისთვის გეოლოგიური დასკვნის საფუძველზე შედგა საპროექტო დოკუმენტაცია და დაიგეგმა სამუშაოები. ამ ეტაპზე ფერდსამაგრი სამუშაოები მერიის მიერ არ არის ჩაბარებული. დარჩენილია ექსპერტიზის ნაწილი. ექსპერტიზის დასკვნის შესაბამისად მოხდება გადაწყვეტილების მიღება“
რა ბედი ელის მესხიძეების 5 წევრიან ოჯახს, ჩვენთვის გაუგებარი დარჩა. ოჯახის წევრებს შიში აქვთ, რომ უამინდობისას გარესამყაროს სრულად არ მოწყდნენ.