საქართველოს შეიარაღებული ძალების IV მექანიზებული ბრიგადის საკონფერენციო დარბაზში ფილმის - „ექვთიმე ღვთისკაცი“ ჩვენება გაიმართა. ისტორიულ-ბიოგრაფიული ფილმი სამხედრო მოსამსახურეებს რეჟისორმა ნიკოლოზ ხომასურიძემ წარუდგინა.
ფილმის ჩვენება მიზნად სამხედრო მოსამსახურეებში პატრიოტული სულისკვეთების ამაღლებასა და საქართველოს ისტორიის დეტალურად გაცნობას ისახავს.
ფილმი საქართველოს ეროვნული საგანძურის მცველის - ექვთიმე თაყაიშვილის ცხოვრებას ეძღვნება. სიუჟეტი 1921 წლიდან ვითარდება და საქართველოს გასაბჭოებისა და პირველი დემოკრატიული რესპუბლიკის მთავრობის წარმომადგენლების საფრანგეთში ემიგრაციის პერიოდს ასახავს.
სიუჟეტი ეხება ემიგრაციაში ექვთიმე თაყაიშვილის ცხოვრებასა და მოღვაწეობას, საქართველოს საგანძურის დაცვისა და მისი დაბრუნების ისტორიას. ფილმს თან გასდევს ექვთიმესა და მისი მეუღლის - ნინო პოლტორაცკაიას სიყვარულის ამბავი.
კინოსურათში ექვთიმე თაყაიშვილის როლს რეზო ჩხიკვიშვილი ასრულებს, ფილმში, ასევე სხვა ცნობილი მსახიობები მონაწილეობენ.
ფილმის ჩვენებას სამხედრო მოსამსახურეები და კინოსურათზე მომუშავე ჯგუფის წევრები დაესწრნენ.