სამხედრო პოლიციის წარმომადგენლები საერთაშორისო კონფერენციაში მონაწილეობენ
საქართველოს თავდაცვის სამინისტროს სამხედრო პოლიციის საგამოძიებო სამსახურის წარმომადგენლები ყოველწლიურ საერთაშორისო კონფერენციაში - „ქალები პოლიციაში“ მონაწილეობენ.
ღონისძიება საქართველოს შს სამინისტროსა და აშშ-ის სახელმწიფო დეპარტამენტის ანტინარკოტიკული და სამართალდაცვითი პროგრამების საერთაშორისო ბიუროს (INL) თანამშრომლობის ფარგლებში უკვე მეშვიდე წელია საქართველოში იმართება. კონფერენცია დღეს, შს მინისტრის სიტყვით გამოსვლით გაიხსნა და მას აშშ-ს ელჩი საქართველოში იან კელი ესწრება. ღონისძიება ოთხი დღის განმავლობაში გაგრძელდება და მასში მონაწილეობას თავდაცვის სამინისტროს სამხედრო პოლიციის ექვს წარმომადგენელთან ერთად 13 ქვეყნის ქალი პოლიციელები მიიღებენ, მათ შორის მოლდოვიდან, მონტენეგროდან, ალბანეთიდან, ფილიპინებიდან, პაკისტანიდან, ინდონეზიიდან და სხვა ქვეყნებიდან.
კონფერენციის მიზანია მსოფლიოში სამართალდამცავ ორგანოებში ქალთა ჩართულობის გაზრდა და ხელშეწყობა. კონფერენციის ფარგლებში დაგეგმილია მონაწილეთა სიტყვით გამოსვლები და ერთმანეთისთვის საკუთარი გამოცდილების გაზიარება, რაც კიდევ უფრო მეტად შეუწყობს ხელს მათ ეფექტიან მუშაობას.