ამერიკის შეერთებული შტატების პრეზიდენტმა დონალდ ტრამპმა 11-დღიანი აზიური ტურნე დაიწყო. ბოლო 25 წლის განმავლობაში ეს პირველი შემთხვევაა, როცა შეერთებული შტატების პრეზიდენტი აზიაში თითქმის ორკვირიან ტურნეს მართავს - იუწყება NBC.
იაპონია, სამხრეთ კორეა, ვიეტნამი და ჩინეთი - ეს იმ ძირითადი ქვეყნების ჩამონათვალია, სადაც დონალდ ტრამპი მეუღლესთან და დელეგაციასთან ერთად ჩავა. აზიური ტურნე ამერიკის შეერთებული შტატების პრეზიდენტმა ჰავაიზე მდებარე პერლ ჰარბორის მემორიალის გვირგვინით შემკობით დაიწყო. პერლ ჰარბორში მდებარე შეერთებული შტატების სამხედრო ბაზა 1941 წელს იაპონიის ავიაციის სამიზნედ იქცა, რასაც 65 ამერიკელი ჯარისკაცის სიცოცხლე ემსხვერპლა.
აზიური ტურნეს ფარგლებში განხილვის ერთ-ერთი მთავარი თემა ჩრდილოეთ კორეის რეჟიმისგან მომდინარე საფრთხე იქნება. ფხენიანის ბირთვულ ამბიციებს ტრამპი როგორც სტრატეგიულ პარტნიორებთან, ასევე ჩინეთის ხელისუფლებასთან აუდიენციისას განიხილავს.
პირველი ქვეყანა აზიური ტურნეს ფარგლებში, რომელსაც ტრამპი ეწვევა, იაპონიაა. 7 ნოემბერს შეერთებული შტატების პრეზიდენტი სამხრეთ კორეაში ჩავა, საიდანაც იგი ჩინეთში გაემგზავრება. სამდღიანი ვიზიტის შემდეგ, მომდევნო დანიშნულების ადგილი ვიეტნამია, სადაც ტრამპი აზია–წყნარი ოკეანის ეკონომიკური თანამშრომლობის სამიტს დაესწრება. საერთაშორისო მედიაში არსებობს მოლოდინი, რომ ამ სამიტზე ტრამპი ვლადიმერ პუტინს მეორედ შეხვდება. პირველად მათი შეხვედრა 2017 წლის 7 ივლისს, ჰამბურგში დიდი ოცეულის სამიტის ფარგლებში გაიმართა.
ვიეტნამიდან დონალდ ტრამპი მანილასა და ფილიპინებს ეწვევა.
ამერიკის შეერთებული შტატების პრეზიდენტის აზიური ტურნე 13 ნოემბერს ფილიპინების პრეზიდენტ როდრიგო დუტერტესთან შეხვედრით დასრულდება.