დავით ებრალიძემ ადვოკატთა ასოციაციის თავმჯდომარედ საკუთარი კანდიდატურა წარადგინა. ებრალიძე, ადვოკატების მიერ ასოციაციის თავმჯდომარედ მისი არჩევის შემთხვევაში რამდენიმე საკითხის მოგვარების პირობას დებს. მათ შორის, ებრალიძის აზრით, აუცილებელია ადვოკატთა პროფესია სრულყოფილი იყოს და მართლმსაჯულების სისტემაში პრობლემები მოგვარდეს. დავით ებრალიძე მიიჩნევს, რომ საჭიროა კანონით დაცული იყოს და სერთიფიცირებადი იყოს ყველა შესაბამისი პროფესიული იურიდიული მომსახურების უფლება. ასევე, ებრალიძის განცხადებით ადვოკატთა ასოციაციას უნდა შეეცვალოს სახელი და დაერქვას პროფესიონალ იურისტთა ასოციაცია. დავით ებრალიძე 2005 წლიდან ადვოკატთა ასოციაციის წევრია. ის 2015-2016 წლებში თავდაცვის მინისტრის პირველი მოადგილის პოსტზე მუშაობდა. 2012-2013 წლებში კი, ფინანსთა მინისტრის მოადგილის თანამდებობას იკავებდა. ებრალიძეს მუშაობის გამოცდილება აქვს მსოფლიო ბანკის ექსპერტის თანამდებობაზეც და ასევე 2003-2005 წლებში იყო ენერგოომბუდსმენი.