აჭარის განათლების სამინისტრო ბათუმის ერთ-ერთ საჯარო სკოლაში მასწავლებლის მხრიდან მოსწავლის მიმართ შესაძლო სექსუალური შევიწროების ფაქტთან დაკავშირებით განცხადებას ავრცელებს.
საზოგადოებასთან ურთიერთობის სამსახურის ინფორმაციით, მიმდინარე გამოძიებასთან დაკავშირებით, სამინისტროში შეტყობინება არ მიუღიათ.
შესაძლო ფაქტი არც სკოლაში და არც სასწავლო პროცესის დროს არ მომხდარა. ჩვენთვის მხოლოდ ცნობილია, რომ მიმდინარეობს მოკვლევა და ეს სამართალდამცველების პრეროგატივაა.
საჯარო სკოლაში მოსწავლემ მანდატურს აცნობა, რომ კერძო მეცადინეობაზე სკოლის გარეთ იმყოფებოდა მასწავლებელთან. თანხის სანაცვლოდ საკუთარი მოსწავლის მომზადების საკითხთან დაკავშირებით კი, სკოლის დირექტორმა უკვე მიმართა დისციპლინარულ კომიტეტს, - განაცხადეს აჭარის განათლების სამინისტროში.
შინაგან საქმეთა სამინისტრომ ფაქტთან დაკავშირებით გამოძიება დაიწყო. საქმე სისხლის სამართლის კოდექსის 138-ე მუხლით არის აღძრული, რაც სექსუალური ხასიათის ძალმომრეობით მოქმედებას გულისხმობს, თუმცა შევიწროების შესაძლო ფაქტი დღეს სკოლის დირექტორმა და სასწავლო ნაწილის გამგემ არ დაადასტურეს.