თბილისი “16+: სიტყვებიდან საქმისკენ“ საერთაშორისო ფორუმს მასპინძლობს.
პლენარული სესია საქართველოს ვიცე-პრემიერმა და საგარეო საქმეთა მინისტრმა მიხეილ ჯანელიძემ გახსნა.
“მე-16 მიზანი ეს არის ის მიზანი, რომელზეც საქართველოს მთავრობა აქტიურად მუშაობს გაერო-ს ფარგლებში. ჩვენ განსაკუთრებულ წარმატებას მივაღწიეთ ტრანპარენტული, ინკლუზიური განვითარებისა და მმართველობის კუთხით. აღსანიშნავია, 38 პოზიციით დაწინაურება საერთაშორისო რეიტინგებში კორუფციასთან ბრძოლის წინააღმდეგ, ასევე 28 ნაბიჯით დაწინაურება მართლმსაჯულების დამოუკიდებლობის მიმართულებით. ასევე მედია თავისუფლების განვითარების მხრივ წინსვლა გვაქვს. შესაბამისად, საქართველო გადაიქცა გაერო-ს დახმარების მიმღები ქვეყნიდან თავისი ექსპერტიზის და სხვა ქვეყნებისთვის დახმარების გაზიარების ქვეყნად და ჩვენთვის დიდი პატივია, დღეს ამ ფორმატში მოვახდინოთ პარტნიორებთან შეხვედრა”, - განაცხადა მიხეილ ჯანელიძემ.
ფორუმის მონაწილეები ასევე მმართველობის, კორუფციასთან ბრძოლის, სახელმწიფო სერვისებში ინოვაციების დანერგვისა და კონფლიქტების მოგვარების საკითხებზე მსჯელობენ.
შეხვედრაზე გაერო-ს ხელმძღვანელმა საქართველოში ნილს სკოტმა რეფორმების გზაზე საქართველოს მიერ მიღწეულ წარმატებებს გაუსვა ხაზი.
"მე-16 საკითხი ეხება ყველა საკითხს, რომელიც უკავშირდება დემოკრატიულ მმართველობას და ჩვენ ძალიან მოხარულები ვართ რომ 25 ქვეყნის წარმომადგენელი დღეს ჩამოვიდა საქართველოში რომ გაუზიაროს ერთმანეთს გამოცდილება და ასევე გაეცნოს საქართველოს გამოცდილებას ამ საკითხში. საქართველო არის შერჩეული როგორც წარმატებული ქვეყანა, რომელმაც მოახერხა და ჩაატარა წარმატებული რეფორმები განსაკუთრებით დემოკრატიული მმართველობის კუთხით", - განაცხადა ნილს სკოტმა გაეროს ხელმძღვანელმა საქართველოში.
თბილისის ფორუმი პირველია 16+ ფორუმების რიგში, რომლებშიც მონაწილეობენ საქართველო და რვა წევრი ქვეყანა, g7+ გაერთიანების სახელმწიფოები, გაეროს ასოციაციების მსოფლიო ფედერაცია (WFUNA) და მისი სამდივნო. საერთაშორისო ფორუმი ორი დღის განმავლობაში გაგრძელდება.