ქედაში ავარიის შედეგად, ექსკურსიაზე დაშავებული ექვსი ბავშვიდან ერთს, გვიან ღამით ოპერაცია ჩაუტარდა. მისი მდგომარეობა, ექიმების თქმით, სტაბილურია.
ბათუმის დედათა და ბავშვთა სამედიცინო ცენტრში კიდევ ოთხი მოზარდი რჩება. მათ სიცოცხლეს საფრთხე არ ემუქრება. კიდევ ერთი მოსწავლე კი ქედის რაიონულ კლინიკაში გადის მკურნალობას.
როგორც ჰოსპიტალის მენეჯერმა განმარტა, ბავშვს მსუბუქი დაზიანებები აქვს. ავტოსაგზაო შემთხვევა გუშინ მოხდა. ბათუმის მე-6 საჯარო სკოლის მეექვსე კლასის მოსწავლეები ხულოდან ბათუმში ბრუნდებოდნენ, რა დროსაც ავტობუსის კარი გაიღო და ბავშვები გადმოცვივდნენ.
შემთხვევის დროს ავტობუსში იმყოფებოდნენ პედაგოგები და მშობლები. ფაქტზე გამოძიება 276-ე მუხლის პირველი ნაწილით დაიწყო, რაც ავტომობილის უსაფრთხოების ან ექსპლუატაციის წესის დარღვევას გულისხმობს, რამაც ჯანმრთელობის დაზიანება გამოიწვია.