თბილისის ბოტანიკურ ბაღში ყვავილების ფესტივალი გრძელდება.

დამთვალიერებელს 130-მდე სახეობისა და ჯიშის მცენარეების ნახვა დღეს, 17:00 საათამდე შეეძლება.

„ყვავილების ფესტივალი ამ მასშტაბით წელს პირველად ტარდება. გამოფენილია დეკორატიული მცენარეები, რათა დამთვალიერებლისთვის უფრო ხელმისაწვდომი იყოს ბოტანიკურ ბაღში არსებული კოლექცია. ღონისძიების მიზანი ჩვენი კოლექციის პოპულარიზაციაა.
დამთვალიერებელს შეუძლია გარკვეული ჯიშებისა და სახეობების შეძენა. რეალიზაციაზე გამოტანილია გამოცდილი ჯიშები.
ბოტანიკურ ბაღში მოსულ დამთვალიერებელს ქრიზანთემებისა და გეორგინების სხვადახვა ჯიშის ნახვა შეუძლია. გვინდა, რომ ყვავილების ფესტივალმა ტრადიციული ხასიათი მიიღოს“ ,- განაცხადა ბოტანიკური ბაღის დირექტორმა თამაზ დარჩიძემ.