ამერიკის შეერთებული შტატები უკრაინისთვის შეიარაღების გადაცემის საკითხს აქტიურად განიხილავს,-ამის შესახებ უკრაინაში აშშ-ის სპეციალურმა წარმომადგენელმა კურტ ვოლკერმა განაცხადა.
მისი თქმით, ვაშინგტონში ამ საკითხზე აქტიურად მსჯელობენ.
ვოლკერის განცხადებით, ყველა ქვეყანას აქვს უფლება საკუთარი თავი დაიცვას.
კიევში ვიზიტისას სააგენტო „როიტერისთვის“ მიცემულ ინტერვიუში დიპლომატმა ასევე ისაუბრა რუსეთ-აშშ-ის ურთიერთობაზე. მისი განცხადებით, რუსეთის პრეზიდენტის თანაშემწე ვლადისლავ სურკოვთან მისი შეხვედრა კონსტრუქციული გამოდგა, თუმცა მნიშვნელოვან წინ გადადგმულ ნაბიჯად ვერ ჩაითლება.
ვოლკერის თქმით, ვაშინგტონში იმედი აქვთ, რომ მოსკოვი უკრაინის კონფლიქტის მოსაგვარებლად მეტ ძალისხმევას გასწევს.
ვოლკერი ასევე მიიჩნევს, რომ რუსეთის სტრატეგიამ უკრაინის აღმოსავლეთ ნაწილში ვერ გაამართლა. „რუსეთი ინარჩუნებდა ტერიტორიებს და კონფლიქტს, რადგან ფიქრობდა, რომ უკრაინაზე გავლენის ბერკეტს მოიპოვებდა, თუმცა კრემლში საპირისპირო მიიღეს. ახლა უკრაინა უფრო ერთიანი, უფრო ნაციონალისტური, ანტირუსული და დასავლეთზე ორიენტირებულია. ეს კი რუსეთს არაფერს აძლევს", - აცხადებს ვოლკერი.