28-29 ოქტომბერს ეროვნული საფეხბურთო ლიგის 32-ე ტურის მატჩები გაიმართება.

„სამტრედია“, რომელმაც გასულ ტურში სტუმრად ლიდერი, თბილისის „დინამო“ 1:0 დაამარცხა, საპრიზო ადგილებისთვის იბრძვის. მოქმედი ჩემპიონი საკუთარ მოედანზე თბილისის „საბურთალოს“ მიიღებს, რომელიც ბოლო ტურის შემდეგ მეოთხე ადგილზე დაწინაურდა და ევროპის ლიგაზე მოხვედრის შანსი გაუჩნდა.

გორის „თენგიზ ბურჯანაძეზე“ „დილა“ ქუთაისის „ტორპედოს“ უმასპინძლებს. ეროვნულ ლიგაში დასარჩენად გორელებს დარჩენილ ხუთ ტურში ქულათა მაქსიმუმი ესაჭიროებათ. ქუთაისელებს კი ბოლო ექვსი თამაში არ წაუგიათ და ჩემპიონობის მოსაპოვებლად მხოლოდ მოგება აწყობთ. ამ მატჩის პირდაპირ ტელერეპორტაჟს 17:00 საათზე, მეორე არხი შემოგთავაზებთ.

პირველი სათამაშო დღე მიხეილ მესხის სახელობის სტადიონზე საჩხერის „ჩიხურასა“ და თბილისის „დინამოს“ მატჩით დასრულდება. ბოლო შვიდი მატჩიდან თბილისელებმა მხოლოდ ორი მოიგეს და ჩემპიონატის დასრულებამდე ხუთი ტურით ადრე „ტორპედოს“ მხოლოდ ქულით ასწრებენ. აქედან გამომდინარე, დინამოელებს პირველ ადგილზე გასასვლელად მხოლოდ გამარჯვება სჭირდებათ.

32-ე ტურის დარჩენილი ორი მატჩი 29 ოქტომბერს გაიმართება: თბილისის „ლოკომოტივი“ მიხეილ მესხის სახელობის სტადიონის სათადარიგო მოედანზე ფოთის „კოლხეთს“ დაუპირისპირდება. ზედიზედ სამი ტურია, თბილისელები ვერ იგებენ და მეოთხე ადგილი „საბურთალოს“ დაუთმეს. ფოთელებმა ბოლოს, 27 მაისს, სწორედ „ლოკომოტივთან“ გაიმარჯვეს - 2:1. მას შემდეგ 17 ტურია არ მოუგიათ და ეროვნული ლიგიდან გავარდნის რეალური საფრთხის წინაშე დგანან.

ტური აჭარული დერბით დასრულდება, რომელიც არა ბათუმის სარაგბო არენაზე, არამედ სამტრედიის ეროსი მანჯგალაძის სახელობის სტადიონზე გაიმართება: ქობულეთის „შუქურა“ ბათუმის „დინამოს“ დაუპირისპირდება. „დინამოს“ აქვს შანსი, „დილას“ გადაასწროს და ლიგაში ადგილი გადათამაშების გარეშე შეინარჩუნოს. ბოლო, მე-10 ადგილზე მყოფმა „შუქურამ“ კი უშუალო კონკურენტ ფოთის „კოლხეთთან“ ჩამორჩენა ოთხ ქულამდე შეამცირა და გადათამაშებაში მონაწილეობის შანსი გაუჩნდა.