ისრაელი-საქართველოს დიპლომატიური ურთიერთობის 25 წლის იუბილეს აღსანიშნავად ქნესეთის თავმჯდომარემ საქართველოს დელეგაციას უმასპინძლა. საქართველოს პარლამენტის თავმჯდომარემ ვახშამზე სიტყვა წარმოთქვა და ორ ქვეყანას შორის ურთიერთობების გაღრმავებაზე ისაუბრა.

„ჩვენთვის დიდი პატივია ისრაელში ვიზიტი. ახლა აღვნიშნავთ დიპლომატიური ურთიერთობების დამყარებიდან 25 წლისთავს, რაც ძალიან მნიშვნელოვანი თარიღია და მოხარულები ვართ, რომ ამ თარიღს ჩვენს ქვეყნებს შორის ძალიან ძლიერი თანამშრომლობის ფონზე აღვნიშნავთ. უფრო მეტიც, ჩვენ გვაკავშირებს არა მხოლოდ დიპლომატიური ურთიერთობები, არამედ, პირველ რიგში, გვაკავშირებს 26 საუკუნოვანი მეგობრობა ხალხებს შორის. და ისეთივე წარმატებულები უნდა ვიყოთ მეგობრობასა და თანამშრომლობაში, როგორც ჩვენი ხალხები. განსაკუთრებულად ემოციური გრძნობები გვაქვს ებრაელი ხალხისა და ისრაელის სახელმწიფოს მიმართ და ყველას, ვინც ისრაელის სახელმწიფოდან საქართველოში ჩამოდის, შეუძლია ეს დაადასტუროს.

ძალიან მნიშვნელოვანია ძალიან ძლიერი სტრატეგიული თანამშრომლობა ქვეყნებს, ხალხებსა და პარლამენტებს შორის. თანამშრომლობის საპარლამენტო განზომილება, რა თქმა უნდა, განსაკუთრებულად მნიშვნელოვანია ჩვენთვის.

ჩვენ უკვე მჭიდრო თანამშრომლობა გვაკავშირებს, მაგრამ არსებობს კავშირებისა და თანამშრომლობის გაღრმავების შემდგომი პერსპექტივები საქართველოს პარლამენტსა და ქნესეთს, აპარატის თანამშრომლებს შორის. როგორც ბატონმა სპიკერმა უკვე აღნიშნა, უკვე გვაქვს კარგი თანამშრომლობა აპარატებს შორის, ერთობლივად უკვე გვაქვს კონკრეტული პროექტები განხორციელებული და უნდა შევქმნათ ძალიან კარგი საფუძველი.

ისტორიული კავშირები ძალიან ძლიერია და ამ ძლიერ საფუძველზე, ჩვენი თანამშრომლობა კიდევ უფრო მჭიდრო უნდა გახდეს. ჩვენი მხრიდან, ყველაფერს გავაკეთებთ ამისთვის. ქართული მხრიდან მოტივაცია ძალიან მაღალია. გვწამს და ვიმედოვნებთ, რომ თქვენც ასევე მზად ხართ ამისთვის.

ეს ვიზიტი, რა თქმა უნდა, არის კიდევ ერთი მნიშვნელოვანი კონტრიბუცია. გვჯერა ქვეყნებს შორის თანამშრომლობის. მცირე ხნის წინ ისრაელის სახელმწიფოში საქართველოს პრემიერ მინისტრის მნიშვნელოვანი ვიზიტი განხორციელდა, რამდენიმე ხნით ადრე კი ისრაელის სახელმწიფოს პრეზიდენტი ეწვია საქართველოს. ასეთი მაღალი დონის გაცვლითი ვიზიტები თანამშრომლობის გაღრმავებაში ძალიან მნიშვნელოვან როლს ასრულებს.

დღევანდელი ღონისძიება არის კიდევ ერთი კონტრიბუცია ამ საქმეში და გვწამს, რომ ჩვენ უნდა ვიყოთ ძალიან ეფექტურები და ეფექტიანები, რომ ხალხებს შორის მეგობრობის გაძლიერებას ხელი შევუწყოთ. საქართველოს პარლამენტი ყველაფერს გააკეთებს ამის უზრუნველყოფისთვის."- განაცხადა ირაკლი კობახიძემ.

ქნესეთის თავმჯდომარემ კი საუბრისას იმედი გამოთქვა, რომ ურთიერთობები კიდევ უფრო გაღრმავდება.

„ჩვენ აღვნიშნავთ 25 წლისთავს დიპლომატიური ურთიერთობების დამყარებიდან. ეს მხოლოდ ფორმალური დღე არ არის, ეს ნამდვილად აღსანიშნავია. არ გვჭირდება ერთმანეთისთვის იმის შეხსენება, რომ საბჭოთა კავშირის პერიოდში ჩვენს ქვეყნებს შორის აქტიური კავშირი არ იყო. ახლა, 25 წელიწადში, გრძელი გზა გამოვიარეთ. ძალიან მნიშვნელოვანია, რომ საპარლამენტო დელეგაციების - მეგობრობის ჯგუფების, სხვადასხვა საკომიტეტო დელეგაციების გაცვლითი ვიზიტები აქტიურია.

ქნესეთის წევრებისა და საქართველოს პარლამენტის თავმჯდომარისგან მოვისმინე, რომ დღეს ქნესეთში წარმატებული შეხვედრები გაიმართა, სადაც უსაფრთხოების, გამჭვირვალობისა და სხვა საკითხებზე ისაუბრეს. აბსოლუტურად დარწმუნებული ვარ, რომ ეს გაგრძელდება. ყოველი დღე მნიშვნელოვანია იმიტომ, რომ რეალური გამოწვევა არ არის ის, როდესაც ჩადიხარ ქვეყანაში, რომელთან ურთიერთობაც პრობლემურია და მაშინვე იწყებ ფიქრს, როგორ გაუმჯობესდეს ეს ურთიერთობა.

დიპლომატიაში როგორც ვამბობთ ხანდახან, ვიზიტი უკვე მნიშვნელოვანი მიღწევაა. ეს ასე არ არის ჩვენი ქვეყნების შემთხვევაში. ყოველთვის უნდა ვიფიქროთ პრაქტიკულ საკითხებზე და მოხარულები ვართ, რომ არის ბევრი საკითხი დღის წესრიგში. ქნესეთის გენერალური დირექტორი, ქნესეთის თანამშრომლებთან ერთად, ეწვევა საქართველოს გამჭვირვალობის, გარემოს დაცვისა და „მწვანე ქნესეთისა“ და სხვა მრავალი პროექტის განსახილველად. მჯერა, რომ ეს საპარლამენტო ურთიერთობები ასახავს ჩვენს ქვეყნებსა და ხალხებს შორის ურთიერთობას."- განაცხადა იული იოელ ედელშტეინმა.