განათლების სამინისტროს შიდა აუდიტმა თბილისის 67-ე საჯარო სკოლის შესახებ დასკვნა გაასაჯაროვა. როგორც დასკვნაშია ნათქვამი, სამინისტროში შესული არაერთი საჩივრის საფუძველზე, სამინისტროს შიდა აუდიტის დეპარტამენტი, თბილისის 67-ე საჯარო სკოლაში არსებულ დარღვევებს, დაახლოებით თვენახევრის განმავლობაში სწავლობდა. შედეგად, გამოვლინდა მთელი რიგი დარღვევები, როგორც ქონების განკარგვის, ასევე, სკოლის მართვის კუთხით, რაც სკოლის დირექტორის გათავისუფლების საფუძველი გახდა.

„შიდა აუდიტის ინსპექტირებით დადგინდა, რომ სკოლის დირექტორი, ხშირ შემთხვევაში, ხელს უშლიდა მანდატურებს საქმიანობაში; სისტემატურად აგვიანებდა გაკვეთილზე; შეუსაბამო ფორმით აწარმოებდა მოსწავლეებთან კომუნიკაციას. ამასთან, მოიჯარეები წლების განმავლობაში უფასოდ სარგებლობდნენ სკოლის მოძრავი ქონებით; სკოლაში არსებული ქონება არ ემთხვეოდა ინვენტარიზაციის შედეგებს და ბოლოს, დარღვევები გამოვლინდა შესყიდვების პროცედურებშიც, რაზეც სკოლას გაფრთხილება ჯერ კიდევ 2016 წელს ჰქონდა მიღებული," - ნათქვამია დასკვნაში.

გასული კვირიდან 67-ე სკოლაში, პერიოდულად, მე-7-8-9 კლასებში საგაკვეთილო პროცესი წყდება. ამის მიზეზი ისაა, რომ მასწავლებელთა ნაწილი გაკვეთილებს არ ატარებს. მათი უკმაყოფილება ქიმიის მასწავლებლის გათავისუფლებას მოჰყვა, რის შესახებაც ინფორმაცია დირექტორმა დაადასტურა. შსს-ს ინფორმაციით, ქიმიის მასწავლებლის დოდო კეზუას მიმართ სისხლის სამართლის საქმეა აღძრული. პედაგოგს ერთ-ერთი მშობელი ბავშვზე ძალადობაში ადანაშაულებს. გამოძიება სსკ-ის 126-ე მუხლით დაიწყო, რაც ძალადობას გულისხმობს.