ისლამაბადში ოფიციალური ვიზიტით ჩასული ამერიკის შეერთებული შტატების სახელმწიფო მდივნისა და პაკისტანის პრემიერ-მინისტრის საუბრის ერთ-ერთი მთავარი თემა ტერორიზმთან ბრძოლის სტრატეგია და რეგიონში უსაფრთხოების საკითხები იყო.
შაჰიდ ხაკან აბასმა რექს ტილერსონთან შეხვედრისას აღნიშნა, რომ დიდი სირთულეების მიუხედავად, რომელსაც მათი ქვეყნის უსაფრთხოებისთვის ტერორისტული ორგანიზაცია „თალიბანი“ ქმნის, კონტრტერორისტული სპეცოპერაციები მთელი სახელმწიფოს მასშტაბით წარმატებით ხორციელდება.
ახლო აღმოსავლეთისა და აზიური ტურნეს ფარგლებში, რექს ტილერსონმა მედიასთან მცირეხნიანი აუდიენციის დროს განმარტა, რომ პაკისტანი თავისი ბირთვული პოტენციალით ამერიკის შეერთებული შტატებისთვის რეგიონში ერთ-ერთი ყველაზე სანდო პარტნიორია.
ბოლო წლებში ამერიკის შეერთებულ შტატებსა და ისლამაბადს შორის ურთიერთობა დაიძაბა მას შემდეგ, რაც ვაშინგტონმა პაკისტანის მთავრობა „თალიბანის“ წინააღმდეგ არაეფექტურ ბრძოლაში დაადანაშაულა.