თეირანის სასამართლომ ისრაელის სპეცსამსახურებთან, მოსადთან თანამშრომლობაში ბრალდებულ აჰმადრეზა ჯალალის სასიკვდილო განაჩენი გამოუტანა.
უმკაცრესი ვერდიქტი ბრალდების მხარემ მოითხოვა.
ჯაშუშობისა და მოსადისთვის ირანის ბირთვული პროგრამის შესახებ ინფორმაციის მიწოდების გარდა, ჯალალი რამდენიმე ირანელი მეცნიერის მოწამვლაში დამნაშავედ ცნეს.
აჰმადრეზა ჯალალიმ შვედეთის ერთ-ერთი სამედიცინო უნივერსიტეტი დაამთავრა, რის შემდეგაც იგი სტოკჰოლმის სამედიცინო ინსტიტუტში ლექციებს კითხულობდა. მას შვედეთში ცხოვრებისა და მუშაობის უფლება ჰქონდა მინიჭებული. პროკურორი სასამართლო პროცესზე ამტკიცებდა, რომ აჰმადრეზა ჯალალიმ დასავლეთში წარმატებულ კარიერას სწორედ ისრაელის დახმარებით მიაღწია.
აჰმადრეზა ჯალალის საქმით უფლებადამცველი ორგანიზაცია Amnesty International დაინტერესდა და შვედეთის მთავრობას მოუწოდა, უმკაცრესი სასჯელის შემსუბუქების თაობაზე, ოფიციალურ თეირანთან დაუყოვნებლივ მოლაპარაკებები დაიწყოს.
შვედეთის მთავრობამ ოფიციალურ განცხადებაში აღნიშნა, რომ თეირანის სასამართლოს გადაწყვეტილებას გმობს და კატეგორიულად ემიჯნება.
მოსადთან თანამშრომლობის ბრალდებით გასამართლებული პატიმარი ირანში სიკვდილით ბოლოს 2012 წელს დასაჯეს.