ერაყის ქურთისტანის ავტონომიური რეგიონის ხელმძღვანელობა ცენტრალურ ხელისუფლებას მოლაპარაკებებს და სამშვიდობო ხელშეკრულების გაფორმებას სთავაზობს. ამის შესახებ იფნორმაციას „ევრონიუსი“ ავრცელებს.
გამოცემის ინფორმაციით, ქურთისტანის რეგიონული მთავრობის განცხადებაში სამ ძირითად მიმართულებაზეა საუბარი, კერძოდ: უნდა შეწყდეს ცეცხლი და სამხედრო ოპერაცია ქურთისტანის ტერიტორიაზე, ერაყის ქურთისტანის ტერიტორიაზე ჩატარებული რეფერენდუმის შედეგები უნდა გაიყინოს და კონსტიტუციის საფუძველზე მოლაპარაკებები უნდა დაიწყოს.
25 სექტემბერს ერაყის ქურთისტნსა და რეგიონის მიმდებარე ზონებში ჩატარებული რეფერენდუმის დროს მოსახლეობის უმრავლესობამ მხარი დაუჭირა დამოუკიდებლობას. ერაყის ცენტრალურმა ხელისუფლებამ პლებისციტი არაკონსტიტუციურად გამოაცხადა და სამხედრო ოპერაციის შედეგად კირკუკის რეგიონი დაიკავა.