კატალონიის ულტრამემარცხენე პარტია „კანდიდატები სახალხო ერთიანობისთვის“ მოსახლეობას, ესპანეთის ხელისუფლების ქმედებებზე პროტესტის ნიშნად, სამოქალაქო დაუმორჩილებლობის აქციისკენ მოუწოდებს.
უცხოური მედიის ინფორმაციით, ულტრამემარცხენე პარტიის წარმომადგენლები აცხადებენ, რომ მადრიდის ქმედებები კატალონიის წინააღმდეგ ყველაზე მასშტაბური აგრესიის მაგალითია ფრანკოს დიქტატურის პერიოდიდან. რადიკალი მემარცხენეები ადგილობრივ მთავრობას რეგიონის დამოუკიდებლობის რაც შეიძლება მალე გამოცხადებისკენ მოუწოდებენ.
კატალონიის რეგიონული პარლამენტის პლენარული სხდომის გამართვა 26 ოქტომბერს არის დაგეგმილი, რა დროსაც სიტყვით გამოვა ავტონომიური რეგიონის მეთაური კარლეს პუიჩდემონი.
ჯერ კვლავ უცნობი რჩება, რა ზომების მიღებას აპირებს კატალონიის მთავრობის მეთაური და განიხილება თუ არა დაგეგმილ სესიაზე კატალონიის დამოუკიდებლობის გამოცხადების საკითხი.
შეგახსენებთ, ესპანეთის ხელისუფლებამ კატალონიის ავტონომიის დროებით გაუქმებისა და ვადამდელი არჩევნების დანიშვნის გადაწყვეტილება 21 ოქტომბერს მიიღო. იმისთვის, რომ ამ გეგმის განხორციელება დაიწყოს, აუცილებელია ესპანეთის პარლამენტის ზედა პალატის თანხმობა. სენატში ამ საკითხზე კენჭისყრა 27 ოქტომბერს არის დაგეგმილი.