მალტაში ცნობილი ჟურნალისტის, დაფნე კარუანა გალიციას მკვლელობის ორგანიზატორთა და შემსრულებელთა გამოვლენისა და მათი მართლმსაჯულების წინაშე წარდგენის მოთხოვნით, მასობრივი საპროტესტო აქცია გაიმართა. დემონსტრაციას ქვეყნის პრეზიდენტიც ესწრებოდა.
აქცია არასამთავრობო ორგანიზაცია „გაერთიანებული სამოქალაქო საზოგადოების“ ინიციატივით ჩატარდა. მასში მონაწილეობას იღებდნენ პროფკავშირების წარმომადგენლები, აქტივისტები და პოლიტიკოსები. თუმცა დემონსტრაციას არ დასწრებია პრემიერ-მინისტრი ჯოზეფ მუსკატი, რომელსაც ჟურნალისტი თაღლითობაში ადანაშაულებდა.
ერთ-ერთ ბოლო პუბლიკაციაში გალიცია წერდა, რომ პრემიერ-მინისტრი და მისი ორი თანაშემწე პასპორტებს ყიდდნენ, მიღებული თანხა კი ოფშორულ ანგარიშზე ირიცხებოდა. მათ შორის, ერთ-ერთი ასეთი გადარიცხვა აზერბაიჯანის ხელისუფლებამაც განახორციელა.
მალტის ხელისუფლებამ მკვლელობასთან დაკავშირებით ინფორმაციის სანაცვლოდ, ერთი მილიონი ევროს ოდენობით ჯილდო დააწესა. ჟურნალისტი 16 ოქტომბერს საკუთარ ავტომობილში ააფეთქეს.
წყარო: DW