პარლამენტის თავმჯდომარის, ირაკლი კობახიძის განცხადებით, თუკი თითოეული პარტია ადგილობრივი თვითმართველობის არჩევნებს სათანადო პასუხისმგებლობით მიუდგება, ინციდენტები თავიდან იქნება არიდებული და ყველაფერი მშვიდ და სამართლიან გარემოში ჩაივლის.
ირაკლი კობახიძემ საკუთარი არჩევანი ვაკის მეორე ოლქის 53-ე საარჩევნო უბანზე გააკეთა და აღნიშნა, რომ ხმა იმ კანდიდატს ხმა მისცა, რომელსაც შეუძლია, თბილისი განვითარების სულ სხვა დონეზე აიყვანოს.
„ამ კანდიდატს შეუძლია, ეს ქალაქი ნამდვილად ისეთი გახადოს, როგორიც გვინდა, თითოეულ ჩვენთაგანს, თითოეულ თბილისელს. დაახლოებით ვიცით, თითოეული ჩვენთაგანი რა არჩევანს აკეთებს. მთავარია, თბილისის განვითარება. დღევანდელი არჩევანი თბილისის სიყვარულით გავაკეთეთ და ჩემი არჩევანი ბევრად უკეთეს თბილისს და თბილისის განვითარებას უზრუნველყოფს. არჩევანების დღემდე ყველაფერი მშვიდ და სამართლიან გარემოში წარიმართა. დარწმუნებული ვარ, დღევანდელი დღეც ასე ჩაივლის. თუკი თითოეული პარტია ამ არჩევნებს სათანადო პასუხისმგებლობით მიუდგება, ინციდენტები თავიდან იქნება არიდებული და ყველაფერი მშვიდ და სამართლიან გარემოში ჩაივლის“, - განაცხადა კობახიძემ "მოამბის" ჟურნალისტის კითხვის საპასუხოდ.