შსს-ს პრესცენტრის ყოფილი თანამშრომელი გოჩა მუკბანიანი აცხადებს, რომ ბუტა რობაქიძის მკვლელობის ადგილას მის მიერ გადაღებულ ვიდეოკადრებში სროლის მხოლოდ ხმა ისმოდა და ამის კადრი არ არსებობდა. როგორც მუკბანიანმა სასამართლოში მოწმედ დაკითხვის შემდეგ აღნიშნა, ადგილზე არც იარაღი და არც საბრძოლო მასალა არ ყოფილა.
მისი თქმით, ახლა უფლებამოსილების ბოროტად გამოყენებისა და მტკიცებულებების ფალსიფიკაციის საქმეზე ბრალდებულმა შსს-ს პრესსამსახურის ყოფილმა უფროსმა გურამ დონაძემ და ამავე საქმეზე ბრალდებულმა ზურაბ მიქაძემ დაუძახეს და მანქანაში ჩასვეს. მოწმის თქმით, მანქანაში დაახლოებით ნახევარ საათს იჯდა, ხოლო როდესაც გადავიდა, ადგილზე იარაღი დახვდა.
მუკბანიანის განცხადებით, მას გურამ დონაძემ პირველ წუთებში გადაღებული კასეტა გამოართვა და ეს მასალა მას შემდეგ არავის უნახავს.
გოჩა მუკბანიანმა აღნიშნა, რომ პირველი გამოძიების პირობებში, მას გურამ დონაძე მისი და მისი ოჯახის უსაფრთხოებით დაემუქრა „თუ კი იმას იტყოდა, რაც ნახა“, შესაბამისად, მოწმე ამბობს, რომ ყოფილი ხელისუფლების პირობებში გამოძიებას ცრუ ჩვენება მისცა.