ამერიკის შეერთებულმა შტატებმა უნდა დაამტკიცოს, რომ ანკარასთან პარტნიორობა სურს, წინააღმდეგ შემთხვევაში, როდესაც შეერთებული შტატები რომელიმე დამნაშავის გადაცემას მოგვთხოვს, თურქეთი მათ ფეთჰულა გიულენის ექსტრადირების მოთხოვნას შეახსენებს.
ამ განცხადებას თურქეთის ლიდერი რეჯეფ თაიფ ერდოღანი აკეთებს.
მისი თქმით, ტერორისტული ორგანიზაცია ”ფეტოს” ლიდერი, შტატებში მცხოვრები ფეთჰულა გიულენი, რეალურად ნომინალური ფიგურაა და სინამდვილეში დანაშაულებრივ ორგანიზაციას სხვები ხელმძღვანელობენ. თუმცა, მის ექსტრადიციას ანკარა ამ დრომდე უშედეგოდ მოითხოვს.
ერდოღანის განცხადებით, ზოგიერთი დასავლური ქვეყანა თურქეთის მიმართ ორმაგი სტანდარტის პოლიტიკას ატარებს.
„ქვეყნები, რომლებსაც დემოკრატიულობაზე აქვთ პრეტენზია, თურქეთში მომხდარ სახელმწიფო გადატრიალების მცდელობაზე საკუთარი რეაქცია მხოლოდ მოვლენებიდან მესამე ან მეშვიდე დღეს გაავრცელეს. მას შემდეგ, რაც ისინი დარწმუნდნენ, რომ “ფეტოს” გეგმები ჩაიშალა", - განაცხადა ერდოღანმა.