ევროკავშირის წევრმა სახელმწიფოებმა თურქეთისთვის ფინანსური დახმარების შემცირებას მხარი დაუჭირეს, - ეს განცხადება გერმანიის კანცლერმა, ანგელა მერკელმა ევროკავშირის სამიტის პირველი დღის დასრულების შემდეგ გააკეთა.
„ჩვენ ერთიანი პოზიცია გვქონდა. მოლაპარაკების პროცესში ორგანიზაციის მხრიდან ფინანსური დახმარების გაწევა შემცირდება“, - განაცხადა მერკელმა.
გერმანიის კანცლერის თქმით, ევროკავშირმა ამ გადაწყვეტილების რეალიზებისთვის ევროკომისიას მიმართა.
ანგელა მერკელმა აღნიშნა, რომ თურქეთში ადამიანის უფლებების კუთხით არსებული მდგომარეობა აბსოლუტურად მიუღებელია. თუმცა გერმანიის კანცლერი თვლის, რომ ოფიციალურ ანკარასთან გაწევრიანებასთან დაკავშირებით მოლაპარაკების პროცესი უნდა გაგრძელდეს.
კანცლერის თქმით, ევროკავშირში თურქეთთან ორგანიზაციაში გაწევრიანების შესახებ მოლაპარაკების პროცესის სრულ შეწყვეტასთან დაკავშირებით საერთო პოზიცია არ გააჩნიათ.
თურქეთმა და ევროკავშირმა ქვეყნის ორგანიზაციაში გაწევრიანების შესახებ მოლაპარაკებების პროცესი 2005 წელს დაიწყეს.